Diabierna ultimo Fraccion di MEP den Parlamento a reuni cu e organo di supervision CAFT. Ademas di representantenan di CAFT tawatin presencia di parlamentarionan di coalicion y oposicion. Esaki ta forma parti di e bishitanan regular di e organo cu ta supervisa finansa di Gobierno. Nan ta reuni cu tur e “Hoge College” nan.
COMENTARIONAN DI CAFT
CAFT a splica cu e presupuesto 2018 ta uno realistico y cu gobierno a tene cuenta cu su consehonan. Un punto di preocupacion ta keda sinembargo gasto di personal den e aparato gubernamental. Esaki, segun CAFT a bin ta aumenta for di alrededor di 300 miyon florin na aña 2009 pa alrededor di 380 miyon florin na aña 2017. Segun e plan di gobierno esaki lo wordo reduci na un manera responsabel y riba termino largo.
COMENTARIONAN DI FRACCION DI MEP
Fraccion di MEP a splica CAFT cu nan ta haya nan forma di proceder aworaki remarcabel. A referi specificamente na e hecho cu den pasado a permiti AVP haci uso di entradanan ficticio y aworaki ta cuestiona entradanan realistico. A splica CAFT con oposicion ta malusa informacion cu CAFT ta duna, saca esaki for di contexto pa asina crea disturbio. Remarcabel ta cu niun parlamentario di AVP a contradeci e ponencia aki durante e reunion.
PROTOCOL Y LAFT
Manera ta conoci CAFT su base legal ta e ley di supervicion y den e ley aki ta referi na e protocol di 2015. CAFT tambe ta di opinion cu e protocol y ley lo mester wordo revisa. Fraccion di MEP a splica cu ta importante pa prome cu e protocol wordo firma entre pais Aruba y Hulanda, nan wordo informa di e contenido, pasobra no lo permiti pa mina pais Aruba su democracia y autonomia, manera Mike Eman y Hulanda a haci den pasado y “bypass” parlamento.
RESPETA PROCEDER DEN UN ESTADO DI DERECHO
Por ultimo lider di fraccion di MEP a splica CAFT cu Parlamento no lo permiti pa mina autonomia di pais Aruba. Pa ley, tarea di CAFT ta pa yuda pais Aruba yega na un finanzas publico sostenibel. Y pa logra esaki a stipula normanan. Es decir e ta inaceptabel cu por ehempel CAFT ta exigi pa entradanan adicional, cu no ta presupuesta, mester wordo aloca pa baha debe. Esaki ta keda e prerogativa di pais Aruba.
Fraccion di MEP kier ta hopi claro den esaki y ta spera cu Hulanda compronde cu no lo acepta e mesun proceder di Hulanda cu a tuma lugar na 2015. Hulanda mester respeta e organo Parlamento y fraccion di MEP lo para duro pa esaki y por escrito splica e secretario di estado sr. Knops esaki dia 3 di juli durante e reunion na VNO. Es decir exigencianan di CAFT cu presupuesto mester wordo adapta y manda bek parlamento ta inaceptabel.
