Dia 28 y 29 maart 2018, Idea (Iniciativa pa Desaroyo pa Empresa Arubano), como parti di Departamento di Asuntonan Economico, Comercio y Industria, a organisa un evento “Farmers’ Cooperative Society Lecture”.
E oradornan di e lectura tabata Sra. Estella Thodé, Sr. Giovanni Kock, Sr. Mario Maduro y sr. Randy Maduro. Sra. Thodé a studia Cooperativismo na Universidad di Antiyas, Universidad di Israel y tambe na Universidad di Delft, Hulanda. Sra. Thodé a pone hopi enfasis riba kico ta un Cooperativa; structura di un Cooperativa; informacion tocante reunion general di un Cooperativ; informacion tocante e Directiva, su tarea y responsalibidad; debernan di un dirigente, y pasonan pa lanta un Cooperativa.
Sr. Giovanni Kock a studia Business Administration cu enfasis riba Cooperativismo na Costa Rica. Sr. Kock a enfoca mas riba e sistema con un Cooperativa ta funciona na Costa Rica y tambe a duna ehempel di un par cu tin na Costa Rica.
Sr. Mario Maduro ta un Senior Medewerker di Afdeling Toezicht Controle en Handhaving na DIP y a enfoca riba e parti di terenonan cu tin disponibel pa agricultura y e proceso corecto pa haci un peticion pa un tereno pa praktica agricultura.
Sr. Randy Maduro ta trahando como PR na Santa Rosa y a presenta tur loke Santa Rosa por ofrece e agricultornan na Aruba y tambe con nan proceso ta hinka den otro.
Un lectura sigur hopi informativo, interactivo y un tremendo presentacion di parti di tur 4 orador.
Idea por a conta cu 36 participante y ta sumamente contento cu e comentarionan ricibi relaciona cu e contenido presenta door di e oradornan. Idea mester remarka cu nan lo sigui apoya e grupo cu a indica di kier traha pa yega na un Cooperatieve Vereniging na Aruba. Pronto nos lo organisa nos prome reunion pa e grupo aki.
Un danki na tur e participantenan y un danki special na e oradornan voluntario cu a comparti nan experticio cu tur esnan presente. Idea ta gradici ‘Gianni’s Group N.V.’ inmensamente cu nan a sponsor Idea cu e localidad y F&B. Tambe un gradicimento special pa tur e coleganan di DEZHI cu a yuda na un of otro manera.
Keda pendiente pa mas lectura, workshops y training den aña 2018 cu Idea lo organisa. Bo kier keda up-to-date cu Idea? Like nos Facebook page: Idea-Aruba.
Abo tin un Idea? Haci bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur informacion y guia necesario.
