Facebook a adkiri e derechonan di Champions League y lo ta e di tres pantaya pa por wak e torneo Europeo na Suramerica. Segun La Nacion di Argentina a confirma, tras algun rumor cu a circula na Juni na Brasil, e siman aki e noticia a wordo confirma y a tuma forsa.
Mientras cu na television e transmision di e partidonan di Champions League lo ta na encargo di ESPN y Fox Sports, Facebook ta bet riba “streaming”. Usuarionan di e red social por wak e partidonan aki en bibo sin necesidad di ta cliente di un operador di cable.
E luga pa disfruta di e Champions League sin paga un solo cen preto lo ta e pagina di Facebook di Champions League, e mesun cu ta suma mas di 65 miyon di siguidor riba e red social. Pa loke ta posibel pa wak e partidonan for di un computer, un tablet of un smartphone.
Pa e proyecto aki, Facebook, UEFA y Turner a cera cabes. E ultimo aki ta e doño di Esporte Interativo, e canal di deporte Brasileño cu tin e derechonan di Champions League. “Turner ta apunta na e superstacionnan (canalnan cu ta contempla varios genero den su programacion) y rednan social.
Den e canalnan por convivi tanto futbol en bibo, como e serienan, e programanan di variedad of e estrenonan di Hollywood. Y na e mesun momento, lo fortalece desde e rednan,” corant Folha de Sao Paulo a remarca. “E plataformanan digital y e relacion cu e siguidornan riba rednan social di Esporte Interativo lo permanece inaltera,” Antonio Barreto, gerente general di Turner na Brasil a añadi.
Por lo tanto, segun La Nacion, Turner y Facebook lo selecta “e miho partido di cada diaranson” pa transmiti’e den “streaming”. Esey ta implica cu e partidonan no lo ta exclusivo die red social y cu e calendario definitivo recien lo ta conoci una bes cu e gruponan keda estableci di e Champions League.
E partido entre Real Madrid Y Atletico Madrid, cu lo tuma luga diaranson na Estonia, lo ta e prome di e transmisionnan via facebook di e torneonan di UEFA na Sur America. “E encuentro di e Supercopa di Europa lo tin dos ekipo di periodista: uno pa Brasil y e otro, na Spaño, pa e siguidornan di Argentina, Uruguay, Chile, Colombia y Mexico. E ekipo di habla Hispana lo ta conforma pa e relator Hernan Feler – integrante di e staff di TNT Sports y e ex futbolista Juan Pablo Sorin cu lo bin acerca como analista,” La Nacion a confirma.
