E fecha cu a cuminsa uza e edificio aki den Indianenweg como Sint Dominicus College no ta conoci, pero e ta data for di hopi aña pasa, mas o menos 1910. Un cantidad di adulto awe a bishita e scol aki den nan infancia, entre 1ste pa 6de klas di scol basico. Awe mainta e basha e edificio abou y hunto cune, un cantidad di recuerdo di nos infancia cu a pasa pa historia.
E scol aki, pa hopi aña maneha pa Ronnie Marrug y despues pa Lionel “Nel” de Cuba, tabata un di esunnan mas grandi na Aruba, cu por lo menos 3 klas di 1ste te 6de klas, di cual e tabata parti entre “kleine kant” di klasnan di 1ste te 3de y e “grote kant” na e banda di Universidad di Aruba cu tabata di klasnan 4de te 6de, mayoria cu un Frere como docente.
Cu tempo, dor cu e scol a crece asina tanto, na aña 1991 a separa kleine kant y grote kant y asina e parti den Indianenweg a bira Colegio Frere Bonifacius y e otro parti a keda St. Dominicus College net banda di Universidad di Aruba.
E scol sinembargo tabatin mester un bon mantencion y 6 aña pasa a mude pa un otro edificio, na ex-VAD Printers riba L.G. Smith Boulevard. Awendia, mirando e situacion di mudamento, e interes pa bay e scol aki a baha drasticamente, probablemente pa e locacion y mudamento constant.
Minister Dr. Rudy Lampe no kier pa e scol caba, pasobra tin demanda pa scol Catolico den Oranjestad. Obispo tambe a vocifera mesun cos. Awor aki DOW mes a core cu e gastonan di desmantelacion y lo cuminsa prepara awor pa un diseño nobo pa Colegio Frere Bonifacius, na e mesun adres den Indianenweg. No tin un presupuesto ainda, “pero nos tin e fondonan pe”, asina Minister Lampe a sigura.
