Dialuna mainta a tuma luga e reunion di Aña Parlamentario 2016-2017, cual a yega su final. Durante di e reunion aki, e parlamentarionan a hiba palabra riba kico tur a sosode durante henter e aña.
Tambe a haci un votacion pe president y vice president di Parlamento 2017-2018. Pa president di Parlamento a bay den 2 tanda di cual president actual Mervin Wyatt-Ras a haya 12 voto, mientras cu vice president di Parlamento a keda den persona di
Rene Herdé cu 12 voto. Mervin Wyatt-Ras a gradici su coleganan cu a sostene pa ta e president di Parlamento un biaha mas, pero tambe el a felicita Rene Herdé pa ta vice president di Parlamento. Durante e reunion a haci un evaluacion di e aña cu a pasa, di cual a ripara cu no a tene hopi reunion. Un total di 900 documento a yega Parlamento, pero for di Parlamento a sali 420 documento cu a keda procesa y a manda carta tambe. A tene 26 reunion publico, cual esun di mas largo tabata 61 ora y esun di mas cortico tabata di 7 minuut. Tambe a trata diferente asunto den Parlamento y un promedio di 0 pa 6% di tur e reunionnan di diferente comision di Parlamento. “E ta un tiki abou”, el a duna di conoce.
Hopi asunto a keda trata den Parlamento, un di nan tabata e ley grandi di Citgo, tambe a trata e ley di Crash cual tabata importante.
A trata e ley di trust y a debati riba dje, asina aki a trata diferente ley. El a sigui a bisa cu iniciativanan di Parlamentarionan a keda trata den Parlamento. E aña aki a produci un documento unda cu ta traha un relato di kico tur Parlamento ta haci, kico e ta nifica y kico tur Parlamento a haci. Esaki ta algo cu a cay den bon tera cerca e Parlamentarionan. El a gradici e griffier pa bin cu esaki, pero e intencion ta cu despues e lo a keda desaroya mas miho. President di Parlamento a gradici un y tur cu a coopera den Parlamento durante e aña cu a pasa. Tin hopi logronan y banda di e documento presenta, tabatin e logronan di renobacion den e sala di Parlamento, a pone airco nobo, tapijt nobo, luznan nobo di LED cu ta “energie vriendelijk”, tin radio y canal di television propio, tambe e website ta traha bon. “Parlamento ta hopi mas transparente cu den pasado y nos ta sigui traha p’esey”, President di Parlamento a indica. Pa cu e apertura di Aña Parlamentario 2017-2018 lo tuma luga diamars mainta y aki ta unda cu e Presidente di Parlamento ta tuma su Decreto Gubernamental, di cual pa prome biaha e lo guia e Parlamento di 2017-2018. Durante e apertura aki lo conta cu e presencia di Gobernador di pais Aruba den Parlamento y e lo duna su discurso riba kico ta e maneho di gobierno pe tempo binidero. E biaha aki no lo conta cu e militarnan, kendenan ta na St. Maarten dunando asistencia, pero e lo ta un momento special segun e constitucion. Den e constitucion ta para cu e Aña Parlamentario lo tuma luga riba e di 2 diamars di September, cual ta un tradicion y e ta hinca den ley. Lo bay tin presencia di un scol den sala di Parlamento pa asina e studiantenan por mira e reunion y tambe esunnan cu kier bin sinta den publico ta bon bini pa haci esaki.
