Den dos diferente adres pariba di brug hendenan arma a drenta cas pa horta of atraca. E habitantenan tabata den nan cas ora e caso a sosode. Tabata mas of menos 9’or di anochi ora melding a drenta cu den “Caya Jose Geerman”, pa ser exacto e cas net pabou di Peking Restaurant, un famia a keda sorprendi pa desconoci nan den cas. Ta trata aki di un homber cu arma di candela. El a drenta cas y a bisa habitantenan di cas pa keda keto y no move. E momento ey tabatin dos mucha di 11 y otro di 13 aña den cas. E homber cu arma di candela a bandona e sitio sin causa ningun daño na miembronan di famia. Polis, recherche, slachtofferhulp y mas autoridad a presenta na sitio. Autoridad a busca rond den vecindario pa cu e sospechoso pero no a topa cu nada.
E otro caso tabata na Noord Cura Cabai. Eynan a drenta informacion cu tin atraco tambe. Polisnan na yegada a bin tende cu un homber arma cu cuchiu a busca manera di drenta pa horta den cas mientras cu e habitante mes tabata den cas. E habitante tabata basta spanta. Polisnan a tuma descripcion di e ladron. A logra calma e habitante. A busca den vecindario pa e criminal cu a causa susto den cas, pero sin resultado.
