Diabierna ultimo a tuma lugar un encuentro hunto cu presencia di Minister di Deporte Dr. Carlos Alex Schwengle, Director di ASU Sr. Jerry Franka, Director di Lotto pa Deporte Sr. Di-Estefano Wernet, Presidente di Aruba Taekwondo Bond Dr. Guaicaipuro Jimenez, Grand Master Chaco Jose Cornelio, Master Eric Barry y e demas miembronan y familiaresnan di e team di Train Hard Fight Smart di Brazil Taekwondo Stichting. E team di Train Hard Fight Smart di Brazil Taekwondo Stichting a wordo invita pa Minister di Deporte Dr. Carlos Alex Schwengle pa un reconocimento special pa nan logro di 4 medaya na Korea.
E tabata un sorpresa total pa e team di Train Hard Fight Smart, pasobra cu nan a wordo honra pa nan bon trabou den un sala bon dorna cu un banner special y fichanan di Brazil Taekwondo Stichting. E 4 atletanan Joshua Klabér, Záhyon Klabér, Jourdé Klabér y Danon Delamore a wordo reconoci pa nan logronan cu nan a logra na Korea y pa e bon trabou y e bon branding di e nomber di Aruba te na Korea. Sr. Di-Estefano Wernet Director di Lotto pa Deporte a hiba palabra di elogio pa e team di Brazil Taekwondo Stichting cu ta un bon ehempel pa e otro deportenan aki na Aruba, pasobra Brazil Taekwondo Stichting mes ta recauda fondo pa asina por biaha y participa na campeonatonan di taya representando Aruba internacionalmente. Brazil Taekwondo Stichting ta un fundacion cu semper a traha na bienestar di su atletanan.
Na aña 2015 e team a biaha pa Korea cu 8 atleta y a bolbe Aruba bek cu 8 Medaya, participando na e World Children Taekwondo Festival y na e Chuncheon Korean Open International Taekwondo Championship. Minister di Deporte Dr. Carlos Alex Schwengle a entrega un faha preto na cada un di e atletanan como un merito di aprecio pa nan gran logro na Korea. Brazil Taekwondo Stichting su directiva y miembronan ta gradici Minister di Deporte Dr. Carlos Alex Schwengle pa su reconocimento na e team di Train Hard Fight Smart.
