Dialuna venidero 18 di juni lo tuma luga un reunion cu character di urgencia, organisa pa partido AVP, na YMCA San Nicolas cu lo cuminsa pa 7’or di anochi.
Un anochi caminda lo duna pueblo informacion riba e consecuencianan desastroso cu e ley di medida cu gobierno MEP-POR-RED ta bay impone riba pueblo, pa trata di cubri su incapacidad pa dirigi e pais den un forma responsabel y adecuado.
Lo duna informacion riba aumento di BBO cu 6%, introduccion di BBO 6% riba transaccion bancario y di siguro y tambe riba carchonan di telefon.
Na mes momento lo informa pueblo riba e serie di aumento cu tin riba gasolin y e impacdto cu BBO 6% ta bay tin riba e prijs di gasoline y dos schakel hunto cu e aumento di accijns cu gobierno a anuncia ta bay tin pa tur hende.
E anochi di informacion aki AVP lo mustra otro consecuencia serio di e ley di medida cu gabinete Wever Croes a introduce riba prijs di pan, mescos cu aumento di airport tax cu 40%.
Sin duda lo duna splicacion riba e ley di medida cu ta inclui tambe e decision di gobierno caminda ta kita reparatietoeslag di tur pensionado cu tin AOV y un pensioen of cualkier entrada adicional, cu ta bay nifica cu mas di 12 mil pensionado ta bay perde nan reparatietoeslag cu e medida cu gobierno MEP-POR-RED a bin cune.
Lo atende tambe e hecho cu gobierno a introduci e medidanan aki sin sikiera bay un Dialogo Social cu partnernan social caminda tambe por a nota e falta di resistencia cerca gremionan comprometi of intimida cu den silencia ta birando complice di e abuso aki contra pueblo.
AVP lo organisa un serie di anochinan di informaciojn pa asina pueblo ta bon na altura di tur loke ta tumando luga y caminda tin cu uni pa asina defende interes di nos pueblo contra di un gobierno incapacita pa atende interes di pueblo manera mester ta.
Na 2009 pueblo a conoce alivio grandi di medidanan cu gobierno di MEP a impone riba pueblo durante di 8 aña y a pasa e siguiente 8 aña di un gobierno di AVP caminda semper a duna esunnan den mas necesidad, alivio necesario mustrando cu un bon gobierno por traha pa su pueblo.
Awor cu otro gobierno di MEP pueblo ta bolbe wordo presenta un cuenta pa incapacidad di un gobierno no tin nocion con pa atende cu asuntonan general di nos pais.
Pueblo ta wordo invita pa e prome anochi di informacion dialuna venider 18 di juni na YMCA San Nicolas cuminsando pa 7’or di anochi.
Ban uni, ban para hunto contra un gobierno cu ainda no tin solucion pa promesanan cu el a haci na pueblo, entre otro di atende cu e situacion financiero sin medida, baha prijs di awa y coriente, baha prijs di gasolin, pero awor tur cos contrario e ta haciendo.
