Despues di a haci varios intento pa haya un manera pa transporta e hobencita Yednielyz Perez Rivas, di 7 aña pa su pais natal Puerto Rico, finalmente a bin logra haya un air ambulance di Air Med bin Aruba pa asina trece e mucha cas.
Nos por bisa cu ya Yednielyz ta na caminda y ta biahando cu un team medico hunto cu e polis retira cu a dun’e resucitacion. Air Ambulance Aruba representa pa Rubert Richards tabata persona clave cu a yuda haya avion pa e famia den nan desperacion.
Air Med
E avion cu a yega Aruba ta un Citation 510 di Air Med, cu a bin di Republica Dominicana cu su tail number HI949 y a baha na W Aviation. E team medico cu a yega, a wordo transporta cu ambulance pa hospital, pa asina prepara e mucha pa e biahe, cu tin un duracion di 2 ora.
Una bes na Puerto Rico, tin un otro ekipo medico cu ta ward’e na e aeropuerto internacional, unda cu nan lo hib’e pa e Centro Pedriatico Las Piedras, caminda cu e lo wordo admiti pa su recuperacion.
No a bay facil
Pero tur esaki no a bay facil. E tabata tin su proceso, unda cu famianan di e chikito mester a pidi ayudo na gobierno estatal di Puerto Rico y tambe na e comunidad Borriqua, pa asina duna un man pa trece nan princesa chikito cas. Aki na Aruba mes, kier a mand’e Colombia, mirando cu Aruba tin cierto acuerdonan cu e pais aki, pero mirando cu ta trata di un turista y pa colmo no tabata tin seguro, no por a haci esaki. Y ta akinan e famianan a cuminsa pidi e ayudo, cual danki na Dios, nan a bin haya.
A conmove Aruba y Puerto Rico
E accidente grave aki sigur a conmove tanto comunidad di Aruba como di Puerto Rico y hasta tin cu bisa cu aki na Aruba mes, intentonan a wordo haci pa duna un man. Mientras tanto na Puerto Rico via di un canal di television local, e welonan materno a haci un peticion na e publico pa nan yuda tambe.
E bon samaritano
Y ta net na Aruba e ayudo a bin, pero no for di un local, sino for di un polis retira, kende tambe tabata cu vakantie, a bin dun’e resucitacion cu awe e mucha ta na caminda pa cas, pa e haya su tratamento. E cabayero, ta esun cu a pone su credit card disponibel, y a haci un donacion di 15 mil dollar, pa asina cubri gastonan di transporte, cual segun e secretario di salud, Rafael Rodriquez, ta costonan di gasolin y nada mas.
E accidente
E accidente serio aki a sosode na Malmok, unda cu e mucha a ricibi sla na cabes, fracturanan serio y a perde su pia drechi. Dokternan aki tabata teme pa su bida. E menor a pasa Aruba riba barco crucero hunto cu su famia. Aki el a accidenta durante un tour. E mes tabata sinta na banda.
Varios hende a yuda ora e accidente a sosode. E menor tabata for di tino y a keda asina tambe hayando e tratamento. Dokternan a evalua su situacion y a opta pa mande Colombia cu urgencia na prome instante pa asina por haya yudansa mas specialisa pa e complicacionnan ricibi.
Mientras tanto na hospital no por a haci nada pa scapa e pia. Dokternan a oper’e mesora y amputa na rudia. Ainda no sa exactamente con e accidente a sosode. Loke si por bisa ta cu e vehiculo ta nobo y ta di un compania di tour. Pesey no por papia di un aparato defecto. Tur cos ta indica cu ta un eror humano di un di e chauffeurnan turista sea di e van of di e UTV mes.
A base di declaracion di testigonan tambe Polis por haya un idea di e accidente. Tabatin mas hende riba tour e momento ey tras di e UTV accidenta riba e caminda di Malmok.
