Festival di Buki pa Mucha 2026 a inicia su programa cu un apertura na Biblioteca Nacional, unda publico por a conoce algun di e autornan invita pa e edicion di e aña aki. E festival lo sigui di 2 te 6 di november, cu bishita n’e scolnan rond henter Aruba.
Zetsia Ponson, coordinador di Festival di Buki pa Mucha 2026, a splica cu preparacion pa e evento ta cuminsa for di cuminsamento di aña, cu seleccion di autornan y e tema central. E aña aki, e festival ta hiba e lema “Luz, camara, accion!”
Durante e siman, e autornan invita lo bishita scolnan basico, kleuterschool, scol preparatorio y scol special. Segun Ponson, e seleccion di e autornan ta tuma na cuenta e relacion di nan trabou cu e tema. Entre e participantenan tin Tito Anzola, Crisèn Schorea y Miss Agi, kende lo presenta nan obra di un manera teatral y creativo.
Ademas di e bishitanan na scol, tin presentacionnan cortico na Biblioteca Nacional na Playa y San Nicolas riba diferente dia di e siman. E programa tambe ta inclui un mercado di buki durante henter siman na biblioteca na Playa.
Ponson a invita comunidad di Aruba pa sigui e actividadnan via e pagina di Facebook “Festival di Buki pa Mucha” y e website di Biblioteca Nacional Aruba. Tambe tin autornan invita na diferente boekhandel, entre otro Plaza Bookshop y De Wit, unda bishitante por haya oportunidad pa topa cu nan y pidi un firma.
E festival ta brinda mucha y hoben oportunidad pa acerca literatura y conoce autornan, mientras cu diferente actividad ta hiba e mundo di buki mas cerca di scol y comunidad.
