Den un conferencia di prensa cu a cuminsa pa 1’or di merdia (ora local), World Health Organization (WHO) a anuncia oficialmente cu e coronavirus a bira un pandemia. Director General di WHO, Tedros Adhanom, a bisa cu den e ultimo dos simannan e cantidad di casonan di COVID-19 (Coronavirus) pafo di China a multiplica cu 13 y e cantidad di paisnan afecta a triplifica. Miles mas ta luchando pa nan bida den hospital.”
“Den e proximo dia- y simannan nos ta calcula cu e cantidad di casonan, cantidad di mortonan y cantidad di paisnan afecta ta aumenta mas ainda.”
WHO a bin ta evaluando e brote y a bisa di ta profundamente preocupa tanto pa e nivel alarmante di plamamento y gravedad, como e nivelnan alarmante di falta di accion. Pandemia no ta un palabra pa uza lihe of sin e debido cautela. E ta un palabra, si e wordo uza di forma incorecto, e lo por causa un miedo sin motibo of un aceptacion inhustifica cu e lucha a caba cu por conduci na sufrimento y mortonan innecesario. Nunca antes nan a mira un pandemia provoca pa un coronavirus. Y nunca antes a mira un pandemia cu por wordo controla na mesun momento tambe. Nan ta pidi e paisnan pa tuma medidanan urgente y agresivo. “Nos a bati e bel di alarma fuerte,” el a bisa. E cifranan solamente no ta conta e historia completo. “Di e 118 mil casonan raporta na nivel mundial na 114 pais, mas cu 90 porciento ta na solamente cuatro pais y dos di nan, China y Sur Korea tin un epidemia cu ta bahando.”
“81 pais no a raporta ningun caso, y 57 pais a raporta 10 caso of menos. Nos no por bisa den bos halto, of cla, of cu suficiente frecuencia: tur e paisnan ainda por cambia rumbo di e pandemia. Si e paisnan detecta, prueba, trata, aisla, rastrea y mobilisa su hendenan, esnan cu un man yen di caso por evita cu esaki ta bira un grupo y cu e grupo ey ta sigui transmiti e virus den e comunidad, “Varios pais a demostra cu por wanta y controla e virus aki. E reto pa hopi di e paisnan no ta si nan por haci’e pero si nan lo hacie.”
