Recientemente dilanti planta di WEB, a inaugura oficialmente e ‘Christmas Village’ pa temporada di fin di aña. Un biaha mas empleadonan di WEB a traha un bunita decoracion di luz.
E biaha aki a pone esaki na WEB mes en bes di na rotonde Tanki Flip manera tawata e caso den añanan anterior. E decoracion ta ilustra un combinacion di fachada di casnan y misa, dorna den estilo di fin di aña. Tambe por admira un obra di arte cu empleadonan a traha cu ta simbolisa 85 aña di produccion di awa. E ‘Christmas Village’ ta un muestra di aprecio pa comunidad di Aruba. Durante e inauguracion a haci uzo di e oportunidad pa otorga un donacion na ‘bisiñanan’ di WEB, cu ta e muchanan di Casa Cuna. Gerencia y empleadonan di WEB Aruba, hunto cu muchanan y e team di Casa Cuna a disfruta di e decoracion den dushi ambiente di Gaita Autentico.
Gerencia di WEB Aruba ta haci uzo di e oportunidad pa gradici e team di empleadonan cu den nan tempo liber a traha e ‘Christmas Village’ y e obra di 85 aña. Bo ta bay wak luz den temporada di fin di aña? Pasa disfruta di e decoracion dilanti WEB na Balashi y saca potret hunto cu bo famia y amigonan!
