Awe diferente bulto a drif yega noordkant di Aruba. “Wardacosta por confirma cu e bultonan aki cu contenido di droga ta procedente for di e interceptacion cu e barco Groningen a eherce dia 10 di augustus ultimo. Durante di e accion di 10 di augustus riba lama, e personanan riba e go-fast a tira diferente bulto den lama. Awe tardi e bulto nan aki a drif yega Aruba”, asina Wardacosta a confirma riba nan pagina di Facebook.
Cuerpo Policial di Aruba hunto cu Wardacosta ta atendiendo e caso. Esaki no ta trata di un caso nobo, pero di e caso cu a tuma luga 10 di augustus ultimo.
Cuanto bulto a haya, no ta conoci ainda pasobra keto bay ta buscando. Tur cos ta mustra cu ta alrededor di 20 bulto a drif di Boneiro pa Aruba. Esaki ta separa locual a topa den e boto caba. Por conclui cu ta un cargamento grandi di droga cu e barco patruyando den Caribe pa Marina Real Hulandes a logra intercepta. A purba tira e bultonan na lama y aunke a topa algun, toch mas o menos binti a sigui drif te cu awe a yega Aruba.
