E ekipo di polisnan riba motorcycle a eherce varios control strategico despues di e festival di Soca diasabra manece diadomingo marduga. E controlnan aki tabata pa revisa si tur papel tabata na ordo den e vehiculo y si e chauffeurnan tabata den condicion pa stuur. De facto, un total di 65 chauffeur a bay cas cu un multa pa paga, debi na falta di cumplimento cu nos leynan di trafico.
Polis a detene no menos cu 10 chauffeur pa stuur un vehiculo bou influencia di alcohol; tambe 1 chauffeur pa stuur auto sin rijbewijs; 44 chauffeur a haya boet pa surpasa velocidad maximo (mas di 100km pa ora); 8 chauffeur a haya boet pa falta di lus (verlichting) y 2 chauffeur a haya boet pa no tin keuringskaart na ordo. Na tur a parti 65 boet durante e control.
Tipo di controlnan asina di e unidad motorisa lo sigui despues di tur evento carnavalesco. Ta conseha automobilistanan pa percura pa tur papel ta na ordo, esta number di aña pasa completamente paga, seguro na ordo, keuringskaart na ordo y e chauffeur mester tin un rijbewijs valido den su poder. Y e reto mas grandi, e chauffeur mester ta na tino, pues no por ta burachi tras di stuur.
Ta conseha amantenan di eventonan di carnaval, cu si Bo sa cu lo bay disfruta di paradanan y cu lo consumi alcohol, regla adelanta cu tin un chauffeur asigna cu lo NO consumi alcohol, pa stuur pa Bo despues di parada.