Durante e siman cu ta tras di lomba, unidadnan di Warda Costa di Caribe Hulandes (Kustwacht) a detecta y stroba diferente boto cu tabata transportando pakete cu contrabanda. E interupcion tabata di tal manera cu e tripulacion di e botonan tabata tira e paketenan for di bordo.
Den e dianan cu a pasa Warda Costa a logra stroba cuater diferente boto di e forma aki. Despues di tira e paketenan for di boto, nan a huy bay den awanan teritorial di Venezuela. E helicopter di Warda Costa y e helicopter di e barco di Marina Real Zr. Ms. Groningen cu ta nabegando pa Warda Costa, a ehecuta e accionnan aki.
A pesar di buskedanan intensivo, no a encontra e paketenan riba lama. Ta sospecha cu e paketenan cu contrabanda a sink. Ta considera tur e accionnan como exitoso pa Warda Costa pa motibo cu e contrabanda no a logra yega tera.
