Manera TREMPAN a duna di conoce, e fin di siman tra’i lomba tabata uno hopi bon pa loke ta e prestacion di Aruba den certamennan di beyesa. Mientras cu nos isla awe mainta ta habri siman entre un accion sindical y un impasse parlamentario, dos hoben a percura pa Aruba tabata liga na resultadonan positivo. Thessaly Zimmerman a figura den Top 10 di Miss Universe na Israel, mientras cu Elizabeth Johnson a corona como Virreina den e eleccion di Miss Teen Grand Universo na Guatemala.
E certamen na Guatemala a tuma luga diabierna anochi cu e representante di Aruba, bayendo cu e premionan di Best Body, Beautiful Face y tambe Best Team, ademas di e corona di Virreina (prome finalista).
Siguientemente tabata den e final di Miss Universe 2021 celebra na Eilat, Israel, caminda Aruba a bolbe figura entre e finalista despues di 25 aña cu Taryn Mansell a logra e titulo di prome finalista.
Zimmerman a cay primeramente den e grupo di 16 semi finalista y despues di desfila den trahe di baña, a bolbe clasifica pa e grupo di 10 finalista. E desaroyonan aki inmediatamente a activa hopi hende riba rednan social sumamente contento. Por a sigui e transmision a traves di TeleCuracao cu tambe a mustra nan entusiasmo pa e logro di Aruba.
Lamentablemente ora di anuncia e ultimo cinco finalista, Aruba no a cay aden. Asina mes, henter Aruba ta hopi orguyoso di e representacion di Thessaly Zimmerman.
LEYENDA:
Miss Universe Aruba y finalista di Miss Universe, Thessaly Zimmerman.
Miss Teen Aruba y Virreina di Miss Teen Grand Universo, Elizabeth Johnson.
