Tur dia nos por lesa den reportenan policial cu nos bishitantenan ta bira victima di ladronicia. Sea cu nan ta bay cu nan pertenencianan for di bao di palapa, of nan ta kibra drenta den nan auto y horta cos. Aunke cu tin control policial, nan no por ta tur caminda pareu, haciendo no solamente nos bishitantenan, pero nos mes como local victima di ladronicia.
Aki ta sigui algun di relatonan for di e reporte policial
Diasabra, pa mas of menos 7’or y 32 di mainta, patruya di Noord a bay na un hotel pa un caso di ladronicia. E denunciante a declara cu dos sospechoso a drenta den su auto. El a sigui bisa cu su auto, un Sport Track color shinishi, tabata para dilanti di Oceania. Tambe el a bisa cu e sospechosonan tabata anda den un Volkswagen shinishi, numera A-11355, cu a core bay direccion La Quinta.
Ladronicia riba beach
Diasabra, pa mas of menos 10’or y 15 di mainta, Central ta manda patruya di strandpolitie na un Low Rise Hotel na Eagle Beach pa un ladronicia. Eynan, polis bay riba e beach, unda cu un turista tabata wardando riba nan. Riba e beach, bao di e hut number 5 polis a topa cu e homber KK, kende a declara cu pa mas of menos 6’or y mey di mainta, el a bay bao di e hut number 5 y a laga su tas preto cu top geel. Despues el a bay desayuna. Den e tas e tabata tin dos serbete oranje di Paradise Beach Villas, 4 clip (2 parecido na sandalia y 2 clip oranje), un clipboard cu puzzel riba dje. Banda di 7’or y mey di mainta, el a bin bek y ya su tas no tabata tey mas. Keho a wordo tuma y Central a wordo poni na altura. Segun testigonan, nan a mira un auto sospechoso ta core den vecindario. E ta matricula A-11355. A tende cu e auto aki tabata na e mesun momento na Oceania y tambe a bay cu tas. Informacion a wordo pasa pa Central.
Basta articulo a wordo horta bao palapa
Diasabra, pa mas of menos 6’or di atardi, Central ta manda patruya direccion un high rise hotel pa un ladronicia. Eynan ta papia cu SD, kende a declara cu el a laga un tas di Little Switzerland, color cora cu blanco bao di un palapa riba e beach pabao di Barcelo hotel y a bay wak e bahada di solo. Pa banda di 6’or y 20 cu el a bay bek, el a wak cu e tas no tey mas. Den dje e tabata tin un cartera di e marca Louis Vuitton, na balor di 600/700 dollar. Den e cartera tabata tin 600 of 700 dollar den placa cash y un carnet di seguro medico di Fidelis. Un holoshi color preto di hende homber, di marca desconoci. Un camara di e marca Nikon, balora na mas of menos 1000 dollar. Un speaker color cora bluetooth di e marca JBL balora na 200 dollar. A puntra D dicon no a yama polis di biaha. El a declara cu e no tabata tin e plan di bay duna keho, pasobra e hotel a priminti’e cu nan lo bay wak den imagennan di video, pa wak ken ta esun cu a bay cu e tas. Ya cu esaki noa logra, nan a yama polis toch. Keho a wordo tuma. Central a wordo poni na altura.
