“Nos ta bin aki pa pasa vakantie, pa gosa, diberti, pa baila y bay casino despues”, asina por lo menos un di e turistanan a bisa nos ayera nochi 11:00pm, ora cu clubnan nocturno y restaurantnan riba e strip dilanti hotelnan Highrise a cera nan portanan. Turistanan a keda para pafo puntrando otro pa unda ta sigui awo, mientras cu e empleadonan a splica nan cu ta tur luga na Aruba ta cera trempan.
Desde inicio di e luna aki, Aruba a habri frontera pa varios pais. Riba dia 10 di juli a habri frontera cu Merca, aunke cu a adapta e medidanan pa evita cu nos ta habri frontera completo cu ciudadnan considera como “hot zone”. Un di e medidanan ta cu e cantidad di turistanan cu ta acepta pa siman ta limita y dependiendo di cua ciudad nan ta bin, cu nan mester test pa Covid-19 eynan mes. Tur esaki den un esfuerso pa purba mantene e virus for di nos isla.
Pero di e turistanan cu si a pasa e test y a yega Aruba sin sintoma y sin e virus, nan ta sinti cu e medidanan na cas ta mucho stringente. E opinionnan ta varios entre kita e medidanan por completo, otronan ta pidi laga e bida nocturno bay te 5:00am, otro te 3:00am, otro te 1:00am y un grupo masha chikito hasta ta dispuesto pa acepta por lo menos un ora extra di ambiente, pues pa keda habri te cu 12:00am.
Un di e turistanan cu a duna entrevista na 24ora.com a bisa cu e no ta compronde e logica. Paden, den e clubnan, tur hende ta pega riba otro, ta mishi cu otro y ta dal den otro pero toch Gobierno ta forsa pa cera tur cos pa 11:00pm. E logica ta comosifuera cu despues di 11:00pm e virus ta activa y ta contagia tur esunnan riba caya, sin tene cuenta cu for di 7:00pm e luga ta yenyen caba.
