Awe mainta despues di 7:00am, e personal di Guarda nos Costa a descubri cu un cantidad di stranheronan permaneciendo den e centro di detencion, a huy for di unda antes tabata Huis van Bewaring na Dakota. E prome informa awe ta papia di 5 persona indocumenta cu a logra burla di e sistema di detencion. Nan a logra zaag e tralinan di hero y a scapa. E grupo tabata cera den containernan riba tereno di HVB na Dakota.
A corta tralie for di 2 diferente container den marduga y asina a sali bandona e centro di detencion sin cu ningun trahado di Guarda nos Costa por a mira, te ora dia a habri mainta. E problema ta cu tin dos generator pa lusa e area, pero nan ta haci basta desordo. Consecuentemente si ilegalnan ta zaag e tralienan mes ta dificil pa e trahadonan por scucha.
Ironia di bida ta, Gobierno di Hulanda a manda miyones di Euro pa Aruba y tambe pa Corsou, den cuadro di e retonan cu a presente inespera debi na e situacion na Venezuela. Esey ta un suma separa di e ayudo pa Coronacrisis. Aruba a opta pa busca algun container bieu, pa uza como centro di detencion, enbes di traha of amplia e facilidadnan di HVB mes.
Pa colmo, como 1 siman caba Cuerpo Especial Arubano (CEA) no ta trahando mas cu Guarda nos Costa. Esaki tin di haber cu di un banda Minister Andin Bikker kier sigui detene stranhero, aunke no tin vuelo pa deporta nan for di nos isla, mientrastanto su colega di Finansa ta sigui corta den presupuesto y baha e trabounan cu Gobierno ta y por haci nan mes, bou di e presion presupuestario cu nos isla ta pasando aden.
Na HVB Dakota tin 48 stranhero cera, di cual 12 ta hende muhe y 36 ta hende homber. Guarda nos Costa tin 3 pa 4 trahado pa cuida e 48 stranheronan aki, cu ta cera sin tin un idea pa deporta nan for di nos isla. Ta parti e trahadonan internamente den forma di 1 hende muhe y 3 hende homber of 2 hende muhe cu 2 hende homber pa traha y cuida e detenidonan. Di acuerdo cu protocol, trahadonan femenino ta atende cu hende muhenan y masculinonan cu e hende hombernan. Kiermen 3 trahado masculino pa atende 36 detenido….no ta dificil e ora pa conclui dicon casi diariamente e situacion ta bira tenso y bay for di man den e luga ey.
Riba dje, trahadonan ta trahando cu un malcontento formal contra e maneho di Minister Andin Bikker y di e director Trudy Hasell. Esey mes lo ta splica e nivel halto di “ziektemelding” cu ta pone un presion mas grandi ainda riba e operacion di e centro di detencion. Trahadonan ta traha overtime pisa pero no ta haya maaltijd bon pasobra no tin. Ta keha cu tur otro departamento si ta haya cuminda despues di pasa 11 ora sigui na trabou, pero na Guarda nos Costa nada!
Nos investigacion a conclui cu tin 6 container riba tereno di HVB na Dakota di cual awe marduga tabatin 34 ilegal masculino cera bou supervision di 2 hende homber so. Na e otro banda tabatin 15 ilegal femenino cera unda 1 solo hende muhe tabatin toezicht. E containernan tin un distancia di 5 meter leu for di e oficina di HVB.
Trahadonan a keha na 24ora.com cu e Director ta bisa nan cu no tin placa pa nada, pa cual mester pidi detenidonan pa nan pidi famia pa trece habon y papel di WC pa nan pasobra no tin. Pio ainda, trahadonan mes mester trece nan mesun papel di WC di cas pasobra Gobierno no tin placa pa puntra. Hopi ta cuestiona unda tur e placa cu Gobierno Hulandes a manda pa atende cu e gastonan rond di detencion di Venezolanonan a bay anto? Ta tur e fondo aki a bay pa “huur” containernan bieu cerca sponsor di campaña? Trahadonan ta denuncia cu ex-Minister Otmar Oduber ta cana rond eyden encarga cu trabou di renobacion y ampliacion di celnan, via su compania di “consultant” mientras cu nan no tin placa ni pa papel di WC.
Maneho di Minister Andin Bikker ta pa cera 8 stranhero pareu den containernan bieu di 40 pia, den cual tin 1 fan, 1 WC, 1 baño y dos bentana chikito. Consecuentemente ta haci hopi calor den e containernan aki!
