Prome Minister di Corsou, Eugene Rugghenaat, a yega Aruba pa bin atende cu algun reunion sumamente importante.
E ta bin topa cu e prome mandatario di Aruba, esta Evelyn Wever-Croes, hunto cu prome minister di St. Maarten, Leona Romeo-Marlin.
El a comenta cu e idea ta pa toca temanan regularmente di interes comun, comparti experiencia y wak con nan por sigui traha hunto.
Esaki ta algo cu kier bay haci tambe na un manera structural, pasobra ta na beneficio di tur e paisnan ruman, Aruba, Corsou y St. Maarten. E biaha aki a biaha den e delegacion, minister di finansas di Corsou, mirando cu tin desafionan comun. A pensa e ultimo biaha cu a reuni na October na St. Maarten, ta bon pa pone cabes hunto, wak con por comparti experiencia y con por deal cu e asunto di supervision, cumplimento cu normanan, etc.
Uni forsa
Segun e mandatario, ta uni forsa pa asina ey cada pais sali dilanti, pasobra e enfoke ta riba crecemento. Apesar cu tin contextonan diferente, ta mira cu tin hopi apertura y oportunidad pa colabora y si a lo menos ta combina expertonan, toca temanan cu a sigui follow up riba dje, pa asina ey cada minister presidente cu su gabinete por beneficia, lo haci esey.
Temanan importante
E mandatario a comenta cu tin temanan cu ta riba finansas. Tin Venezuela por ehempel. Pero tambe tin cosnan mas structural, manera e prioridadnan cu cada un di e prome ministernan, hunto cu e gabinete a pone, ta e parti di integridad, cu por mehora bon gobernacion y pa tin mas confiansa den e pueblo cu nan ta sirbi. Tin otro temanan mas specifico di areanan di cooperacion. Por ehempel preparacion di nan Cuerpo di Ambtenaar pa e parti legislativo.
E agenda ta ambicioso y hopi varia. E ta hopi contento di ta bek na Aruba. Ultimo biaha cu e tabata tey tabata dia di Himno y Bandera. E ta ansioso pa e reunionnan di mañan y ta sigur cu lo tin resultadonan concreto.
