Diaranson, net algo prome cu 2’or di merdia, a sosode un accidente na Eagle Beach. El a sosode net caminda tin movecion di waverunner.
Despues di un mal tempo, e zwemzone no tey mas. E mal tempo a bay cu un parti di e zwemzone y turistanan tabata landando. Net e momento ey un di esnan cu ta traha na un watersport a bay afo pa yama turistanan cu a huur waverunner, pa nan bin aden.
Ora cu e ta biniendo aden, despues di a yama nan, el a dal un turista landando den cabes. Ta trata aki di un turista crucero. El a keda herida, cu slanan basta serio, cu un kap na cabes. Hendenan di watersport a bula na awa y a saca e turista. Despues nan a bati alarma mesora. A cuminsa yud’e.
Ambulance a yega y a atende cu e turista, kende tabata un dama di edad tiki halto. El a yega cu crucero tambe y a wordo transporta pa hospital.
Un investigacion a cuminsa mesora na e sitio. A keda confirma cu pa falta di zwemzone, cu a ranca pa motibo di mal tempo, no ta full Eagle Beach tin zwemzone.
Despues di eynan a cuminsa cu un discusion entre hendenan cu ta cana rond riba beach, causando problema y esnan di watersport. Cos a hera caba na pelea, pero polis a interveni mesora y a calma e situacion.
Ora cu polis a caba cu su investigacion, nan a wordo acerca pa un homber. E homber ta bisa polis cu e ta buscando su casa. E no sa unda su casa ta. Ora cu nan a bay controla y check e nomber, y ora a bay check na SEH, ta trata di e dama cu a wordo alcansa pa e waverunner. E cabayero no tabata sa mes cu ta trata aki di su casa.
A pidi pa slachtofferhulp bay hospital di biaha pa atende cu e situacion, mirando cu ta trata di un turista, pa nan atende cun’e riba e situacion pa e por yega bek na barco of atende cu e problemanan cu el a haya su mes aden pa motibo di e accidente.
Maritiem Politie tambe a wordo avisa, nan a yega na e sitio y forma parti di e investigacion hunto cu Strandpolitie.
