Pa 40 aña caba ta organisa e Turibana Loop. E ta un di e caredanan mas bieu riba e calendario di careda na Aruba y awo Ibisa kier a reintroduci careda cu un bachi nobo.
Diseño di un logo nobo tambe di Turibana Loop 10.5, ta un di e cosnan cu ta biniendo cun’e, segun Wil Erasmus.
E careda aki lo tuma luga diadomingo, dia 8 di september, cuminsando pa 6’or di mainta y manera e ultimo añanan, ta start na MFA na Noord. E inscripcion a cuminsa caba y tin 750 cupo y te asina leu tin mas cu 630 registracion pa e careda haci. Si tin hende cu ta interesa pa core, tin luga ainda. Por subi riba e pagina di Facebook di Ibisa, unda cu tin un link pa por registra, of por bay riba internet y yena Turibana Loop 2019 y ta yega na e pagina di registracion pa e careda aki.
Tin un prijs pa local, cual ta 20 florin pa e careda. Tin un prijs internacional pa coredonan di afo cual ta $15. Prijs pa relay ta 35 florin pa e dos participantenan y tambe tin e careda di mucha cual ta 15 florin.
Individual, tin distancia di 10.5 kilometer. E 10.5 tambe ta pa e relay, parti den 5.25. Pa e muchanan tin dos distancia, cual ta 1.6, pa muchanan di 8 pa 13 aña y 400 meter pa e muchanan di 4 pa 7 aña.
Hopi importante ta cu e careda aki ta cuminsa pa 6’or. E relay team ta pidi pa nan tey prome cu 5’or y mey, mirando cu e bus ta sali pa 5’or y mey pa e coredornan di relay, p’asina pasa den e proceso di registra, subi den bus y para na nan post.
E ruta di e careda no ta cambia, segun Erasmus. E ruta ta cuminsa for di MFA, bay nort. Ora pasa Saliña, bira na man robes direccion Marriott, despues bira na man drechi bay direccion Malmok, despues den e bocht bay direccion Tierra del Sol. Prome cu yega eynan, caminda cu tin e post di e relay, e careda ta sigui pasa e bocht di Tierra del Sol y sigui pa MFA Noord pa e careda di 10.5 kilometer.
Ta invita tur mucha pa bin participa. Esaki lo ta un careda ideal pa nan habri nan caredanan di aña escolar. Ainda tin luga pa mucha, hende grandi y relay team.
Bibnan a yega
Erasmus a agrega cu e shirt y bibnan a yega. Manera programa, dia 19 di augustus, esta dialuna otro siman, ta cuminsa cu partimento di tshirt y bib. Tur esnan cu a registra pa e careda por pasa na oficina di Ibisa, pa asina nan busca nan tshirt y bib.
Ta bay tin mas sorpresa pa otro aña. Keda pendiente tambe pa Turibana Challenge pa 2020.
Rafael Perez, coordinador di Turibana Loop 2019, su di 40 edicion, a menciona cu na 2018 nan tabata tin 476 participante y aña pasa tambe tabata prome biaha cu a introduci “1 mile for kids”, cual tabata un exito rotundo pa nos muchanan.
Na 2017 tabata tin 17 team di relay y na 2018 tabata 97 team. E aña aki ta spera un crecemento na esaki tambe.
Ta haci un peticion pa ta tempran y pasa na e mesa di registracion di Ibisa, pasobra e bus lo sali pa 5’or y mey pa bay na e exchange point di e relay.
E atletanan pa Turibana Loop di e aña aki lo haya nan dryfit shirt, medaya di participacion, nan bib number y chip.
Tambe lo bay t’ey pa yuda e participantenan, AVF cu warming up, cooling down y massage despues di e careda. Ta algo prome biaha cu ta haci’e durante di e caminata.
Tin e premiacionnan pa e diferente categorianan: Top 3 Female, Male y Overall Winners. Top 3 Female, Male U20. Categoria di 20-29, 30-34, 35-39, 40-44, 45-49, 50-54, 55-59 y 60+.
E relay teamsnan, pa loke ta categoria ta Duo Male, Duo Female y Mixed.
Pa loke ta muchanan, careda di 1 mile, ta bay tin tres male, female categorianan di 8-9, 10-11 y 12 pa 13.
Den 400 meter, ta bay tin tres top male, female, di 4-5 y 6-7.
E proteccion y siguridad di e participantenan ta na prome luga, segun Perez di Ibisa. Riba henter e ruta Cuerpo Policial lo ta compañando e participantenan. Motor Unit, Rode Kruis y empleadonan di Ibisa y tambe demas boluntarionan.
Ta urgi na tur participante pa sali tempran, tene cuenta cu tur e desvionan cu tin actualmente den trafico. Pa automobilistanan, tene cuenta cu dia 8 di september, pa 4’or y mey di marduga, p’anort di e rotonde bay nort dilanti di MFA lo ta cera pa motibo di e careda.
Teniendo cuenta cu siguridad di e participantenan, ta tene cuenta cu september ta hopi calor. Cada 2.5 kilometer riba e ruta ta bay tin un waterpost. Ademas di e waterpost na final, Brandweer cu un spuitwagen ta bay tin un douche pa asina por cool down tambe despues di e careda. Tambe manera semper, nan ta bay tin fruta y bebidanan refrescante pa e participantenan despues di e careda.
Turibana Loop, ta pa promove e estilo di bida saludabel, e aña aki celebrando su di 40 edicion. Ta pidi encarecidamente, publico en general pa bin apoya tur e participantenan. Ultimo tempo e tabata un trend masha leuk pa mira con esaki ta tumando luga. Bin apoya nos muchanan, bin apoya e participantenan y e ta bon pa salud.
