Director di Directie Infrastructuur en Planning (DIP) a confirma na nos cu tin un empleada na cas, cu prohibicion di entrada na DIP. Esaki despues cu a bira conoci cu tin un investigacion penal y disciplinario tumando luga relaciona cu practicanan sospechoso na corupcion den e departamento cu ta otorga tereno y cu ta huur propiedadnan di gobierno. E empleada envolvi ta Doris Jimenez, cu desde ayera diamars ta na cas, prohibi di drenta tur edificio di DIP mientras cu ta investigand’e. Na mes momento a entrega un keho penal tambe na Landsrecherche pa e mesun practica aki.
Fuentenan ta sigura cu un ke otro tin di haber cu tumamento di placa for di huurdo di propiedadnan di gobierno. Ta un practica straño pasobra normal ta paga na Departamento di Finansa di Gobierno pero e empleada di DIP lo ta tuma e cen pero e huurdo no ta mira cu su cuenta ta baha. Coleganan a bisa cu no ta algo di awo, sino ta di masha dia tin wowo riba dje pasobra e ta por lo menos un di esunnan cu a drenta DIP bou tempo di ex-minister Otmar Oduber.
Ta sospecha cu Jimenez ta tuma placa di huur di kiosconan y ta bisa e huurdonan cu e ta fix pa nan na DIP. Pero, ora a bay check, e placa sea no a yega DIP nunca of no ta credita nan cuenta cu ne, pues cu den e sistema ta parece cu e huurdonan no a paga nan huur. Esey a pone cu e bala a cuminsa lora y a start un investigacion interno, basa riba kehonan cu huurdonan di kiosco a manda aden na e departamento pa nan placa di huur cu ta parce “perdi”.
Mester menciona cu for di DIP mes a bisa nos cu ta prefera pa no bay den detaye di e investigacion. A confirma cu e empleada ta na cas cu prohibicion di entrada y cu ta sospech’e di a haci algo cu como empleada di DIP bo no mester haci. “Pero ban laga onderzoek determina kico exactamente el a haci”, asina ing. Haime Croes a contesta. Si recherche a detene e persona of a interog’e, no por bisa pasobra e empleada ta na cas desde ayera.
Mester menciona cu despues di salida di ex-minister Otmar Oduber como minister di infrastructura y cu entrada di ex-Minister Marisol Lopez-Tromp, ta basta suspension a cay y hendenan cu te dia di awe ta na cas. Tambe ta conoci cu tin investigacion andando cu asunto di otorgamento di tereno durante tempo di ex-Minister Oduber, di cual e investigacion a haya e nomber di “Flamingo”. Ey tin ambtenaar di DIP na cas suspendi ainda, wardando e investigacion penal tuma luga ainda.
Pero, despues cu Oduber a tuma su retiro como minister y cu a sigui ministernan Lopez y Wever cu e cartera, atrobe a cuminsa un otro investigacion cu na inicio a yama “Aloe” y despues a cambia e nomber pa “Kukwisa.” Ainda no tin sospechosonan oficialmente anuncia den e caso, pero si a drenta DIP y a confisca computer y documentonan. Landsrecherche ta investigando e caso aki ainda.
