Pa varios dia caba, a yega varios imagen na nos mesa di redaccion di diferente persona cu, na nan yegada n’e caminda pa bay direccion Parkietenbos, nan no ta lora bay na man drechi, sino na man robes, drenta den verboden. Esaki ta pasobra tin un borchi, pa un tempo caba, ta cubri pa un mata cu ta haci e borchi aki menos visibel of practicamente invisibel.
Pa un tempo caba esunnan cu ta bay cumpra nan gas, e trucknan cu ta move den e area, a bati alarma cerca nos pa tira un bista, mirando cu e situacion aki ta uno hopi peligroso, na momento cu nan ta lora e bocht, sea cu nan ta bin di ariba.
Na momento cu yega e cruzada aki, nan topa cara cara cu por ehempel turista den auto di huur, unda e situacion ta bira uno hopi peligroso y alarmante, caminda nan mester desvia pa evita un accidente frontal.
Ta spera cu e departamentonan concerni por pasa y corta e mata, pa haci e borchi di trafico aki (verboden) mas visibel p’e automobilistanan, p’e turistanan cu ta mobilisa den e area aki, na momento nan bay e diferente restaurantnan den e bario, p’asina evita un desgracia den un di e dianan aki.
