Turistanan di barco a subi caya cu step. Esaki ta turista cu no ta gasta placa na Aruba ni pa un boter di awa. Cu nan step ta baha di barco y ta recore nos isla. Tin un grupo similar cu ta haci mescos cu bicicleta.
E cameranan di siguridad den Emmastraat a capta con e turistanan ta subi Emmastraat lora den verboden pa drenta Koningstraat. Hasta chauffeurnan den Koningstraat cu normalmente ta mira e trafico na man drechi, ta haya nan mes cu e grupo di turista riba step ta sorprendenan den verboden.
Turistanan mes ta busca mal ora pa nan curpa manera e dicho di nos grandinan. Kizas APA cu autoridad na waf mester avisa e turistanan of e cruseronan cu ta prohibi sali cu e vehiculonan aki for di waf. Sikiera asina nan por usa nos tour operadornan pa laga algo atras. E tipo di turista aki ta sali caya barica yen cu nan coy bebe den rugtas y recore e isla cu nan step y bay bek barco merdia pa come.
Un turista hopi cheap cu awo a bira tambe un peliger riba caya coriendo den verboden.
