Manera tabata e caso aña pasa Aruba lo haya bishita un biaha mas di un crucero destina solamente pa hende homber.
E crucero lo ta na Aruba dialuna 18 di maart. Ta trata di un compania cu a charter e barco completamente. Ta trata di e barco di Virgin Voyages y yama ‘Valiant Lady’. Nos por corda e barco aki a hala bastante atencion algun siman atras ora cu el a sali for di Aruba ilustrando e palabra Aruba y un curason.
E barco a sali diasabra dia 16 di Maart for di Puerto Rico. Diadomingo tabata un dia riba lama y dialuna e lo bishita Aruba. Despues e lo sigui pa Curacao, Martinique, St Kitts y termina bek na Puerto Rico.
Lo tin algun mil di ser masculino riba e barco cu lo disfruta tambe di diferente actividad tanto riba barco como riba tera na cada destino.
Apart di stimula e economia di Aruba cu tours, compras y mas nan lo disfruta tambe di nos beachnan. Ta conoci cu e demografico aki tin un poder di compra hopi bon.
Manera ta conoci e concepto di charter barco crucero ta hopi popular. Algun otro charter ta por ehempel barco cu tema di musica eletronico y of Caribense. Tambe tin charter di yoga etc.
