Shonnan amante di bon domino, tuma un ‘zit’! Prepara bo copi koffie, sinta recht y prepara bo mes pa un drama estilo novela cu a tuma lugar na e unico y berdadero Domino Square Garden aya na Calabas. Diasabra ultimo, 5 di maart, pa 7:00 pm, e veteranonan di Team Snor a enfrenta e ekipo nobis nobis di Tsunami bou guia di e famoso manager di Sams, esta Sunny. Pero prome cu nos revela e drama cu a tuma luga, laga nos rewind e tape un tiki, ban bek un tiki den tempo y ban bek n’e oranan calor dje merdia ey ora un grupo di ‘paisa’ a dicidi di celebra nan diabierna merdia eynan.
Wowonan dje flamante juffrouw Chines encarga cu e luga a habri hancho hancho bira rondo ora cu un grupito di ‘paisa’ a dal porta di Domino Square Garden habri estilo pelicula di cowboy y grita “Una botella de Old Parr por fabor!” Wel wel, e juffrouw Chines, cual su nomber traduci na Hulandes kiermen “mooi” of “schattig”, a promove e grupo di “paisa” di biaha pa VIP, oftewel na Hulandes “niet zomaar paisas” y a core hala mesa di domino pa nan, pone bluetooth yora Vallenato y laga nan bati piedra bay off henter merdia te atardi! Un detaye chikito e damita den su entusiasmo a lubida … bo no por come y warda e bolo pareu!
Ban forward e tape un tiki, y ata! 7:00 a bati y integrantenan di ambos team ta drenta pa cuminsa nan bataya dje anochi ey, pero ainda n’e mesa VIP, Vallenato y “botellas” di Old Parr ta skeiro bay gol. Y aki nan shonnan, e rabo di porco a cuminsa krul. Gerencia di Domino Square Garden ta man na cabes, pasobra e grupo VIP di “paisa” no ta van plan di lanta zomaar despues di a saca varios yuwana berde pa nan plezier y entrega nan “VIP-domino-table” asina asina tampoco! Mientras cu gerencia ta suavisa cos, Team Snor a conoce locual den marina ta yama “muiterij” “Mutiny on the Bigote”! Cinco integrante di Snor ta grita cu e cos aki no por y ta bandona Domino Square Garden mal rabia bek rumbo pa San Nicolas!
Team Snor ta keda mal manca, pero estilo Ucrania contra Rusia, sin miedo ta enfrenta e batayon fuerte di Team Tsunami! Dr. Sunny sin piedad ta pasa dos capoti y ta demostra su skills den domino. Half time Team Tsunami ta dilanti cu 11-8, y despues ta gana cu 21-16! Tremendo bataya, pero a lo largo Team Tsunami ta demostra superioridad absoluto y ta laga Team Snor pega bou palo di kwihi aya na Highway 69 na Calabas! Laat, hopi laat den madruga, celular ta ring cerca un di nos investigadonan y un informante anonimo di Snor ta basha abou … e cinco integrantenan di Snor cu a bula pipa a uza “paisa” como smoesje pa nan bula afo ora nan a wak e forsa impactante di Team Tsunami. Un atake masal di colio! Pero, manera siguidonan di bon domino sa, e cos aki no ta bay keda asina … “het muisje krijgt nog een staartje”! Keda pendiente, pasobra scenario dje unico y famoso Domino Square Garden aya na Calabas ta bay bira cayente di berdad!
