Direktiva di Swim Club Orca Curaçao por mira bèk riba un fin di siman hopi eksitoso na Boneiru, pa e disiplina di waterpolo. Djabièrnè 29 di sèptèmber 2017 un delegashon di 47 persona (atleta, dirigente i fanátiko) a biaha pa Boneiru pa partisipá na e “2nd Bonaire International Waterpolo Meet”, organisá pa e tim di landamentu i waterpolo Baracuda’s. Un tremendo organisashon por sierto, tur wega a kuminsá na ora i tur kos a kana manera mester ta!
E aña aki tambe tabatin weganan di beachpolo.Den e parti aki Kòrsou a partisipá ku U-14, U-16 i e señornan .Den e parti di waterpolo Kòrsou a partisipá ku U-12, U-16 i e señornan.
Den Waterpolo:
E kompetensia den kategoria U-12, tabatin 2 wega djasabra i 1 wega djadumingu. Orca kontra di Baracuda’s. Orca a empatá 2 wega i pèrdè 1 wega. (skor 9 – 9, 10 – 10 i 7 – 8) TREMENDO partido di waterpolo a keda ekshibí di parti di tur dos ekipo. Tin futuro den e deporte aki sigur sigur!!!
E kompetensia den kategoria U-16. Nan a hunga 1 wega djasabra i un wega djadumingu. Orca kontra di Baracuda’s. Orca a pèrdè tur dos wega. (skor 0 – 15 i 7 – 12), den e di dos partido e atletanan di Orca a duna un mihó bataya.
E Kompetensia di waterpolo den kategoria Señor. Nan a hunga 1 wega djasabra i 1 wega djadumingu. Orca kontra di Baracuda’s. Orca a gana tur 2 wega. (skor 14 – 6 i 17 – 11), partidonan fuerte hunga!
Den beachpolo:
E kompetensia den kategoria U-14 a hunga 2 wega djasabra i un wega djadumingu. Orca kontra di Baracuda’s. Orca a gana tur tres wega. (skor 13 – 5, 9 – 7 i 15 – 5).
E kompetensia den kategoria U-16 ,a hunga 1 wega djasabra i 1 wega djadumingu. Orca kontra di dos tim di Baracuda’s. Orca a gana 1 wega i pèrdè e otro. (skor 14 – 4 i 2 – 16).
E kompetensia den kategoria señor a hunga 1 wega djabièrnè, 2 wega djasabra. Orca kontra di dos tim di Baracuda’s. Orca a gana tur dos wega. (skor 11 – 7 i 12 – 6).
Direktiva di Orca ta gradisí tur atleta pa nan komportashon i prestashon, mayornan ku a bai i ku no a bai, coachnan pa e gran trabou ku nan a desplegá promé ku e biaha i na Boneiru.
Un danki na Carib Intertrans Shipping & Transport (www.caribintertrans.com) e spònser ku a yuda Orca pa Orca por a bai uniformá Boneiru. Direktiva ta hopi gradesido na boso tur!!!!
