Trahadonan di PNA den accion pasobra no ta respeta nan derecho

Un biaha mas trahado nan di Parke Nacional Aruba a pone trabou abou dialuna mainta tempran. Y un biaha mas nan problema ta cu e directiva aki, “no ta trahadonan husto y no ta respeta derecho di e trahadonan.” E accion a bay bou guia guia di sindicato SEPPA y Secretario General Magaly Brito tabata presente pa brinda apoyo na e miembronan.
E problema di e situacion di e trahadonan di Parke Nacional Arikok (PNA) ta algo cu ta data pa basta tempo caba, tanto bou di e anterior directiva como bou di esun actual. “E problemanan no a caba,” Magaly Brito a bisa.

Sindicato a sinta na mesa cu e directiva nobo unda cu tin tres punto cu mester a atende: 1) Reglamento Interno; 2) Lista di Obheccion; 3) Negociacion CAO. Mirando e situacion cu tin andando, a dicidi di duna prioridad na punto no. 2 ya cu esaki tin tin di haber cu salario di e trahadonan, y tambe nan derecho.

 

Pero e discusionnan ta tumando demasiado tempo, gobierno a cambia su sistema di duna subsidio na fundacionnan y tambe e hecho cu awo calculacion di salario, dunamento di promocion of periodiek ya no ta sosode door di DRH  mas of a base di e mesun sistema cu pa añas tambe ta conta pa trahadornan di Parke. Awo esaki mester sososde door di e mesun dunado di trabao. Pero directiva di PNA kier bin cu su mesun sistema sin a papia mes cu sindicato.

Despues di basta reunion y discusion, finalmente SEPPA a logra cu directiva a bay na e sistema anterior. “Nos a keda mustra nan cu e sistema aki ta esun valido .y cu pa.hopi aña tabata esun aplicabel. Parke no por sin mas bin kita e sistema y no bisa kico ta bin na su luga.”

Pero e directiva nobo despues di a sinta na mesa, aceptando esaki, no a respeta e palabracion. “Tin erornan ta wordo haci den calculacion di e salarionan y esakinan ta loke a wordo poni den e Lista di Obheccion. Y esaki ta e mesun erornan cu e directiva anterior a bisa tambe cu mester wordo drecha, pero cu directiva nobo no kier haci. Nan a manda nos un carta na luna di mei unda nos ta conclui cu nan no ta dispuesto pa drecha e erornan,” Brito a splica.

E trahadonan a bay den accion pasobra e puntonan riba e Lista di Obheccion ta masha importante pa atende cu nan. E ta cosnan cu ta regarda e actual y futuro trahadonan. “E ta algo cu mester wordo regla y trahadonan kier claridad. Nos a sinta na mesa pero directiva no ta mantene nan mes na palabracion.”

Awo SEPPA y su miembronan trahando na PNA ta duna nan chens pa recpacita. Tambe a manda carta pa Gobierno. Dado momento nan lo mester informa directiva cu nan mester bini cu un sistema cu ta funciona pa PNA.

PNA tin un directiva cu personanan capacita, pero riba cierto tereno nan falta poco di conocemento. Y si no tin e conocemento aki, mester buske. “Decisionnan cu bo ta tuma mester husto. No ta pasobra e ta nifica placa extra, ta dicidi pa no haci e cambio. Un solucion por ta pa Minister conceri pone un funcionario di DRH pa studia e situacion,” e sindicalista a bisa.