For di ayera caba trahadonan di fundacionnan cu ta resorta bou di Ministerio di Asuntonan Social di Minister Glenbert Croes no a cobra e suma di Afl. 1600 di “Bashipremie” manera tur otro empleado publico. Na Departamento di Finansa di Gobierno nan a haya contesta cu Minister Croes no a duna ordo pa paga e fundacionnan. Esaki ta straño pasobra otro fundacionnan cu ta resorta bou otro Ministerionan si a cobra normal.
For di aña 2005 caba fundacionnan cu ta cobrando salario como subsidio di Gobierno ta haya e mesun areglo cu empleadonan publico. Como tal nan tambe ta gosa di e beneficionan manera ta “Bashipremie” di Afl. 1600 den luna di januari. Asina tambe tin un otro bonus na augustus y otro na november.
E trahadonan disgusta a yama nan sindicato caba, cu mesora a cuminsa e proceso pa delibera cu Departamento di Finansa y cu Minister Glenbert Croes.
