Cooperacion oficial entre UNICEF y Crisis Plan Social

Manera ta conoci tur partner riba tereno social ta trahando estrechamente hunto pa asina resolve hopi di e retonan social cu tin riba nos pais.

Un di e aspectonan hopi importante cu a percura pe, ta cu e Crisis Plan Social ta cubri tur puntonan cu mester di atencion. Na Augustus 2018 e instancia internacional di Nacionnan Uni, UNICEF, a wordo invita pa haci un bishita pa asina realisa un ‘quickscan’ di e situacion social riba nos isla. A base di e ‘quickscan’ aki a duna recomendacionnan concreto con Aruba por atende cu aspectonan di e crisis social. E recomendacionnan di UNICEF a wordo incorpora tambe den e Crisis Plan Social.

Den cuadro di e cooperacion cu UNICEF, e siman aki representantenan di UNICEF a regresa Aruba pa tene diferente reunion tocante e proyecto di Crisis Plan Social. E meta di e bishita e biaha aki ta pa oficialmente cuminsa cu un cooperacion di trabou y asina sigui monitor e progreso di e Crisis Plan Social. Tabata na november di aña pasa cu un acuerdo a ser firma entre Minister Glenbert Croes y UNICEF riba ayudo tecnico cu lo ser duna pa crea un sistema di registro, esta e ‘Child Protective System’. E sistema aki lo yuda pa proteccion di nos muchanan.

Sra. Marlies Filbri, sra. Anna Kroon y sra. Emily Costa di UNICEF a reuni cu representantenan di Departamento di Asunto Social, Cede Aruba, CBS, Universidad di Aruba y otro instancianan activo riba e tereno social. Tambe a reuni cu Minister Glenbert Croes pa asina comparti e desaroyonan cu a nota durante di e bishita aki. Minister Croes a expresa su gratitud pa e trabou y a enfatisa su compromiso y di Gabinete Wever Croes pa e proyecto aki.

E representantenan di UNICEF a keda contento cu e reunionnan y a remarca di ta impresiona cu e trabounan y dedicacion cu ta ser desplega den e Crisis Plan Social. Nan a keda satisfecho cu e seriedad cu tur partner ta atendiendo cu e retonan riba e tereno social. Aunke cu tin hopi trabou ainda, ta convenci cu tur e esfuersonan aki lo yuda yega na solucionnan concreto y duradero pa combati e crisis social den nos comunidad.

Comments

comments