TNO: Aquaponics y Hydroponics ta factibel na Aruba

Recientemente TNO Caribbean, riba invitacion di Minister di Transporte, Comunicacion y Sector primario, Chris Romero, a presenta resultado di un proyecto piloto di e sistemanan Aquaponics y Hydropinics, den colaboracion cu Santa Rosa. E proyecto aki, tin como nomber “Demonstration of Aquaponics & Hydroponic systems in Aruban climate”, enfoca riba e preocupacion cu ta biba den nos agricultornan local pa cu continuacion di nan ofishi, teniendo na cuenta e scarcedad di awa cu tin na Aruba.

E estudio di e proyectonan piloto aki a tuma lugar entre september 2017 y november 2018 y ta completa caba. E estudio a keda efectua pa un ekipo di experto local di TNO Caribbean, experto di TNO for di Hulanda y experto di Santa Rosa. A experimenta solamente cu mata di Aruba cu por wordo uza den cushina local, manera bonchi largo, tomati, comcomber, bonchi kinchonchi y jambo. 

E estudio piloto aki a duna di conoce cu tecnologia di Aquaponics y Hydroponics ta uno factibel pa Aruba y cu un consumo abou di awa. E estudio aki a duna espacio pa selecta ekiponan relativamente barata pa permiti cu un instalacion asina lo ta na alcanse di tur cunukero. 

Basa riba e resultado, e siguiente pasonan pa sigui lo ta pa continua cu un investigacion mas detaya cu lo permiti pa yega na un reduccion substancial di e gastonan di operacion. 

E conclusion prelimario ta bisa cu e produccion agricutural por aumenta si uza e combinacion di optimal di nutriente pa Aruba, cu a keda descubri. Intencion ta pa TNO publica mas di e combinacion optimal aki den futuro na benefico di nos cunukeronan, aportando asina na siguridad di cuminda pa nos pais. 

Teniendo na cuenta e cantidad halto di importacion di cuminda y productonan agricultural cu nos ta importa for di exterior, e combinacion aki lo por yuda reduci e dependencia strategico cu nos tin riba loke ta bin di otro paisnan. Na mes momento e lo por aporta na un alimentacion saludabel pa nos poblacion y na un prijs rasonabel.

E estudio ta duna di conoce cu uzo di ekiponan relativamente economico y cu ta obtenibel localmente, lo por permiti produccion agricultural halto tanten cu tin e conocemento di e combinacion di nutriente optimal. 

TNO a expresa cu, como parti di nan compromiso cu Pais Aruba, nan ta na disposicion pa keda asisti riba e tereno aki. Minister Chris Romero a keda hopi satisfecho di mira e trabou profesional cu a keda relata den e estudio aki.

Comments

comments