Den e caso di menasa di bom, cu a tuma luga diadomingo anochi, polis tabata tin un rol hopi importante. Segun alto comisario di polis, Andrew Hoo, un cabayero den transito cu tabata na caminda pa Boneiro, no lo tabata contento cu e procedura di siguridad cu a wordo tuma na Aruba.
El a bisa cu bijdeze, e tin un bom riba su curpa y tambe un arma. Automaticamente esaki a trece cun’e cu proceduranan mester a wordo implimenta.
Tur partner a wordo yama pa cuminsa traha ariba y mescos cu e situacion di ultimo biaha cu Tui, mester a ontruim e avion y cuminsa full e procedura hunto cu AAA, cual tambe ta un di e partnernan, ora cu un situacion asina aki pasa.
Brandweer tambe tin su rol y tambe tin un procedura cu tin cu ehecuta.
E parti di polis ta pa detene e sospechoso y ristra henter e avion hunto cu e bomverkennernan. Un biaha mas, a haya un bon cooperacion di Koninklijke Marechausse cu a bin asisti e biaha aki.
Door cu ta trata di un avion Hulandes, ta bon pa tin nan abordo pa eventualmente si tin algo cu por a bay robes. E procedura a bay bon. E biaha aki a bay basta lihe cu e avion toch lo por a yega alcans pa yega su oranan. Door cu e tripulacion ta mara na cierto oranan cu nan por opera e avion, a logra toch den un tempo record, siguiendo tur e proceduranan, e avion a sali, cu e tripulacion por a bula toch den e avion, rumbo Boneiro.
Hoo a sigui splica cu no por desvia cu siguridad ta bay prome. Proceduranan mester wordo sigui. E consecuencia ta pa esun cu ta haci e melding. E ta cay cera. E consecuencia ta pa e persona.
Pa loke ta e yiunan, nan a sigui rumbo Boneiro. Hunto cu Ministerio publico e decision a wordo tuma cu nan por sigui. Tambe a palabra cu KLM cu tin un decision eynan y nan no tabata tin obhecion pa e yiunan bay Boneiro.
Pa loke ta e sospechoso cu a meld un bom rib Tui, ta cana rond eyfo. Comisario Hoo a splica cu e persona aki, ta un Hulandes. Un rato tin cu wak e leynan di migracion kico por tin den poder pa por mande bek Hulanda. E ta bira dificil. Tin di compronde, cu e persona aki no ta mucho bon di cabes. No ta asina lihe un aerolinea ta bay tum’e. Tin yen di cos cu tin cu bay wak ainda. Mientras tanto, e ta forma un molester. E ta na Aruba kedo bay.
Otro departamentonan mester tambe cay aden. No ta solamente e tarea di polis so, segun comisario Hoo.
