Loke ta pasando cu ‘global warming’ y cambio climatico ta un risico grandi pa henter mundo y specialmente pa islanan chikito manera Aruba. Ora ta papia di nivel di lama cu lo bay hisa, ta algo hopi real y cu Aruba lo bay bira victima hopi grandi di esey, claro no solamente turismo pero henter e pais lo tin hopi risico.
Prome cu bo bin cu plan riba kico lo haci pa Aruba, mester haci un analisis di kico precisamente por pasa na Aruba. Aruba Hotel & Tourism Association (AHATA) ta un di e partnernan cu ta sponsor e estudio cu lo bay haci pa delinea kico ta e risiconan exactamente cu Aruba tin.
“Pasobra ora bo tin un plan special di kico ta bo risico, e ora ey bo por crea accionnan cu mester tuma pa mitiga e problema di cambio climatico, specialmente pa Aruba den particular”, segun CEO di AHATA, Tisa LaSorte. P’esey AHATA ta participando segun LaSorte pasobra esaki no ta solamente pa turismo pasobra si beachnan disparce e ta afecta turismo pero tambe henter nos economia. Esaki ta un problema cu nos sa ta biniendo pa hopi aña caba y LaSorte ta expresa cu nunca ta mucho laat pa cuminsa.
Ta hopi importante pa tur hende na Aruba compronde cu ta keda na nos pa defende nos naturalesa cual na su turno ta defende nos economia tambe. “Sin un Aruba bunita bo no tin actividad economico tampoco. E ta un balans cu nos mester tene na cuenta, nos mester un bon plan, nos mester scucha tur hende, e comunidad y tur cu ta biba na Aruba, comercio y gobernante mester ta envolvi den un plan asina pa tuma e miho decision pa Aruba su futuro.”
AHATA ta apoya e hecho cu kier hinca derecho di naturalesa den nos constitucion pa asina duna oportunidad cu den futuro mas instancia por uza corte of proceso legal pa defende nos naturalesa.
