Tin un grupo di maestro rabia. For di december ultimo gobierno mester a paga plac’i overtime, pero te ainda nada. Cada luna ta priminti cu “awo si”, pero ainda nada. Parce, recien a bolbe ricibi un update di e pago, caminda Departamento di Enseñansa a indica cu porfin minister a aproba e pago.
Segun DPS, cos a tarda un tiki mas cu normal debi na e calculacionnan tecnico. Pero e docentenan ta fada y ta sinti nan mes “no aprecia.” A traha ora extra y ta husto pa ricibi bo pago, pero, ta parce cu gobierno y e flamante Minister di Enseñansa, no tin e veld aki na pecho.
Sobadje, gobierno debe no solamente e docentenan pero henter e aparato gubernamental, placa cu a entrega durante e periodo di COVID. Di otro banda, ta mira un sindicato di maestronan (SIMAR), keto y mudo. Algun docente a comenta cu ta sinti cu e presidente di SIMAR, Angelique Quijada, ta casa cu gobierno y tin miedo di sali pa vocifera preocupacion di miembro.
E no ta un secreto cu e parti di ‘public speaking’ no ta e parti mas fuerte di e presidente nobo di SIMAR, sinembargo, no sali na defensa di bo miembro, por mustra cu; bo ta casa cu gobierno. Contrario n’e presidente saliente, Josephine Albertus, semper a sali na defensa su miembronan, pero ta mira un cambio grandi den e sindicato di maestronan.
Ta spera cu e biaha aki si, na luna di mei manera DPS a priminti, por cumpli cu pago di e docentenan, mirando cu a traha duro y pa oranan largo y te ainda nada. Gobierno ta seis luna laat cu e pago.
