Locual nunca antes a bin padilanti, por lo menos no den media, ta e kehonan penal cu ex-minister Marisol Lopez-Tromp a haci na Landsrecherche contra mas di un minister den e Gabinete Wever-Croes.
E lider actual di partido MAS no a menciona nombernan y a laga esey habri pa speculacion pero si a confirma cu tin keho y cu e investigacionnan ta andando. Cu esey por conduci na detencionnan despues di eleccion, e no por a contesta, pasobra esey ta den man di husticia pa dicidi. El a cumpli cu su trabou pa denuncia locual el a constata como actonan dudoso y misterioso.
Por corda ainda, cu e tempo aya a papia di casonan specifico na Departamento di Infrastructura y Planificacion (DIP) den cual por lo menos un inversionista Venezolano a insisti na un trahado eyden cu el a sponsor un politico pa e haya un tereno na altura di Pos Chikito. Parce cu e tempo ey e inversionista a menciona esaki na e trahado di DIP, cu a pone e declaracion riba papel. E tempo aya e inversionista a yama e ambtenaarnan bek pa pidi nan pa por fabor no papia mas di e asunto ey pasobra e minister (awendia) a yam’e y bis’e cu e ta hinc’e den problema. No ta conoci awo si ta e mesun caso aki ta referi na dje, cu a entrega keho na Landsrecherche pa consideracion di Procurador General. Pa mas informacion, lesa e edicion di TREMPAN di awe.
