Ex-minister Robertico ‘Tico’ Croes tabata un di e participantenan siman pasa durante e prome “Siman di Sostenibilidad,” cu a tuma luga di dia 16 pa dia 20 di april, den e famoso sala di e sede di Nacionnan Uni na New York.
Durante e siman a debati cuestion mundial urgente manera e sostenibilidad di e debe, e stabilidad socioecnomico y turismo. E tema principal, turismo, a figura diamars 17 di april como “Acto tematico di nivel halto riba turismo.”
Entre e temanan central di e acto aki a figura e papel crucial di turismo, transporte sostenibel y e conectividad, como tambe e infrastructuranan.
Diferente representante di rango halto di e gobiernonan di e miembronan estado di Nacionnan Uni, di sector priva y di e organisacionnan internacional, tabata invita p’e presidente di e Asambleanan General di Nacionnan Uni. Tambe algun specialista destaca, manera profesor Robertico ‘Tico’ Croes, di University of Central Florida.
Segun e observadornan, e echo cu Croes tabata invita como orador p’e Presidente di e Asamblea General, ta mustra e importancia y relevancia di su gran specialidad. Richard Quest, personalidad di medio di comunicacion conoci internacionalmente, entre otro CNN, a actua como moderador.
