Dia 22 april 1993, Accion Ambiental, un grupo di cuater hende (Milton Ponson, Marcos Bislip, Sandra Robles y Sheila Lampe) hunto cu Fundacion Desaroyo Ecologico Aruba a tene un rueda di prensa y a reflexiona riba e necesidad pa proteha nos planeta, su recursonan natural y eco-sistemanan y pa transmiti e mensahe aki na e hubentud di Aruba.
Na 1994, Dia di Tera a bira un evento nacional na Aruba, ora cu a hisa e “Earth Flag” na Biblioteca Nacional Oranjestad riba dia 22 di april. Gobernador di Aruba tawata presente y Prome Minister Nelson Oduber a hiba un discurso pa e publico presente. Ariba e mesun dia un rueda di prensa a ser teni cu e tema “Nos Recursonan Natural ta nos Rikesa Economico”, un brochure a ser presenta, titula “Aruba, One Natural Island” y Accion Ambiental a anuncia cu lo manda un delegado pa participa den e Global Conference on the Sustainable Development of Small Island Developing States na Barbados e mesun aña.
Pues e aña aki danki na Fundacion Accion Ambiental y desde 2002 tambe oficialmente via Rainbow Warriors Core Foundation ta marca 30 aña di celebracion di Dia di Tera y nos ta dedica e dia aki na memoria di Sheila Lampe, luchado naturaleza cu a bay laga nos e aña aki
Tema pa 2024: Planeta vs. plastic; Reduci uzo di plastic cu 60% pa aña 2040
Earth Day Network cu cual desde 1993 tanto Fundacion Accion Ambiental y Rainbow Warriors Core Foundation a traha estrechamente a pone como tema “Planet vs Plastics: Reduce the Use of Plastics by 60% by 2040, esta Planeta vs. Plastico, Reduci Uso di Plastico cu 60% pa 2040”
Den su mensahe pa Dia di Tera 2024, Secretario-General di Nacionnan Uni Antonio Guterres ta menciona na inicio “Nos ta depende di naturalesa pa nos cuminda cu nos ta come, e aire cu nos ta respira y e awa cu nos ta bebe. Sinembargo, nos a crea caos den e mundo natural: nos ta venenando nos planeta cu contaminacion, eliminando especie y ecosistema den forma descabeya y destabilisando nos clima cu emision di gasnan invernadero. Fuera di cambio climatico un di e impactonan mas negativo cu ser humano ta causa ta e polucion di plastico.
Pa na Aruba nos cumpli cu e tema di e aña aki nos por cuminsa cu elimina TUR awa, refresco, bebida y producto di cuminda empaketa den boter di plastic. E keda estableci cientificamente cu boter di plastico ta produci micro y nanoplastic cu ta ser ingeri ora nos come e cuminda of bebe e likido emboteya den plastic.
Plastic cu ta caba como polucion den lama tambe ta drenta e cadena alimentario marino via micro y nanoplastico y ta termina den productonan alimenticio di lama pa consumo humano. E sobredesaroyo di turismo a provoca multiple protesta masal e siman aki na e Islas Canarias contra turista, cu segun e habitantenan cu ta protestando ta cabando cu nan pais.
