Bunty Radhakrishnani ta por lo menos un di e testigonan di e atraco cu a tuma luga ayeranochi na The Ritz-Carlton Aruba. Dos sospechoso a los tiro y a bay cu cantidad grandi di diamante y joyas for di Jewels in Paradise. Bunty a mira ora cu nan a sali for di e hotel.
El a conta Polis cu pa 10’or di anochi el a drenta den casino pa e por distrae su mes, prome cu e bay cas. Net cu el a drenta den casino, el a mira hende ta core. El a dicidi bay check mas leu y el a nota algo sospechoso. El a mira algun hende bisti pa tira atraco. Un di nan el a mira bon bon, cu tabata tin barba blanco manera Santa Claus. Nan a sali lihe lihe. Bunty a spanta masha hopi mes. El a papia cu polis y recherche. A puntr’e tur cos y na bon manera.
Sinembargo, e problema tabata cu el a perde su yabi y nan a tuma esaki como sospecho di atraco. Despues cu nan a haya esaki, a yama Bunty, unda cu nan a puntre si ta su yabi. E recherche a bis’e cu lo dun’e e yabi, pero no por dun’e su auto. E no ta compronde dicon e no por haya su auto pa dos dia.
E auto di Bunty tabata para den e parkinglot di The Ritz-Carlton Aruba. E no ta compronde dicon e no por a hay’e. El a haci su contribucion civico y toch asina e no por haya su auto. El a keda para riba su palabra y a splica tur cos bon cla di e atracado cu el a mira. El a haci bon y a pag’e malo. Bunty no por bisa cu nan a trat’e malo, pero si e hecho cu e no por haya su auto e no ta compronde.
Bunty a mira e atracadonan, pero no a tende nan papia. El a duna descripcion di e hendenan. El a splica tur cos y hasta haltura.
E momento cu Bunty tabata eynan, e no a scucha ningun tiro. Solamente el a mira e conmocion y a mira hopi turista ta core. Pero nada di tiro. Tabatin hopi hende eynan y ta testigo. Bunty ta un di nan, pero awo ta sinti cu el a bay haci algo “pa bon” cu a sali’e “di malo” pasobra ate awo sin su auto pa e por bay su trabou.
