Diasabra awo, 18 di november lo tuma luga un evento gratis p’e pueblo di Aruba. Aki ta caminda cu por haci bo chekeo medico sin ningun costo. E ta den cuadro tambe di 75 aña di existencia di Lions Club. Gerardo Figaroa ta miembro di Lions Club y ta encabesa e comision cu ta yuda organisa e evento aki hunto cu Xavier University.
E evento lo tuma na Xavier University situa den Santa Helenastraat. Por haci diferente test medico sin ningun medico. Tur cos ta cuminsa pa 9:00 am y a termina pa 1:00 pm. Lo tin un algo di bebe y come gratis pa tur cu presenta.
No ta prome biaha cu Lions Club ta organisa tipo di evento asina. Nan tin un bon relacion di trabou cu Xavier University. E bon di e dia aki ta cu bo ta haya bo resultado di biaha. E no ta solamente pa hende grandi sino pa mucha tambe. Por pensa riba testnan di sucu, sanger y mucho mas. E studiantenan di Xavier lo ta esunnan encarga pa haci e testnan cu e personanan cu presenta riba e fecha aki.
Lo tin diferente stand pa ricibi informacion relaciona cu Bo salud. E ta necesario pa papia tambe riba diabetes, lo enfoca riba e tema aki mirando e cantidad di persona diabetico cu tin riba nos isla. Ta importante pa enfoca riba e prevencion y no ora baca hoga caba.