Telico a tira su amigo Ponsy mata na Rooi Bosal

Diabierna anochi amigonan a topa otro na un cas na Rooi Bosal, na cas di e pareha di Telico, pa hunga domino. Algo a bay robes durante e wega y hacimento di chansa cu a pone cu Telico Lares a bay paden, coy un arma di candela, bin pafo y apunta riba Ponsy. Tur hende a kere ta chansa y a bise stop cu wega y el a los un tiro den pecho di su amigo. Un rato despues e amigo a fayece na Hospital.

E victima
E victima ta Edward R. “Ponsy” Thiel, naci na Aruba dia 20 di november 1986 y como tal tin apenas 31 aña di edad. E tabata cu su ruman tambe na e cas na Rooi Bosal. E ruman a sali defende y Telico kier a tira e ruman tambe pero no a logra den e pelea. E ruman mes a transporta Ponsy pa Spoed Eisende Hulp na Hospital pa ayudo, pero lamentablemente no a logra.

E sospechoso

E sospechoso ta un tal Telico Lares, kende apesar di su edad hoben, tin un record basta amplio den buki di Polis. E no tin mucho tempo liber, despues di a sinta un castigo na KIA. Polis ta consider’e peligroso y cu e ta cana arma. Su defunto mama, Astrid, a traha hopi aña na Ministerio Publico. Dia di entiero di su mama nan a detene Telico, pa portacion di arma di candela.

Telico tambe a haya sla

Con e asesinato a tuma luga na Rooi Bosal no ta mucho bon conoci ainda. Tin varios version, pa cual Polis ta investigando cada un separa, pa mira cua ta cuadra cu e berdad y cu e pruebanan adkeri na e sitio. Hecho ta cu den e tiramento tabatin un pelea pasobra un rato despues, mas o menos 2:00am, Telico a bay Centro Medico na San Nicolas pa busca tratamento medico. Team di Aresto di Polis a haya sa y a bay detene eynan mes y hibe Warda di Polis na Santa Cruz. A haci uzo di AT comokiera cu el a caba di tira un hende y como tal, e ta peligroso y por ta arma. Si nan a haye cu e arma ainda no ta conoci.

Ponsy ta masha stima

Aunke cu riba red social tin hende a referi na problema di gang cu a desemboca den un victima, toch mayoria otro hendenan a mustra masha respet y cariño pa e victima. Tur ta bisa cu e ta masha keto y no ta buscado di problema.

Kico a pasa na e cas anto?

Awor Recherchenan di Santa Cruz tin un tarea pisa pa saca afor kico a sosode na e cas situa net dilanti RudSen na Rooi Bosal, na Santa Cruz. A scoge dos recherche cu amplio experencia y cu a yega di cera Telico caba den pasado pa dirigi e investigacion penal aki, pa sa kico a conduci na e asesinato. Un grupo ta bisa cu ta hacimento di chansa y cu Telico kier a spanta Ponsy anto e tira a sali “per ongeluk” mientras cu otronan ta bisa cu e situacion na e cas dado momento a bira cayente, a bay for di man y arma a cay den wega y tiro a sali.

Tur informacion por yuda

Na e momento aki, tur tip por yuda Recherchenan pa soluciona e caso lamentabel aki. Si abo sa mas of a tende mas of tabata presente, por yama Recherche di Santa Cruz of por yama tipline di Polis na 11141 y laga bo mensahe anonimo atras. Famia y amistadnan di Ponsy merece sa e berdad y e sospechoso, Telico, merece sinta un castigo mara na e acto criminal cu el a comete contra su mesun “amigo”.

Comments

comments