Telefon pa Hubentud cu programa di tres serie na television

Telefon pa Hubentud pa hopi aña, ta un fundacion cu ta hopi den comunidad. Ta purba di ta mas cerca di nan grupo meta, cual ta muchanan entre 8 y 24 aña.

Segun Shurman Milliard, trahado social y Relacionista Publico di Telefon pa Hubentud, tur aña nan ta bin cu diferente proyecto, cu mester ta innovativo, mester tin un base, mester tin un voormeting, un tussenmeting y un nameting. Den tur nan proyecto ta haci esaki.

Mescos cu aña pasa, mescos cu proyectonan di sexualidad, proyectonan di app pa Telefon pa Hubentud cual ta sumamente moderno y avansa. Ta wak tambe nan website y TPH TV, un di e delaster tareanan cu TPH ta laga wak cu sa kico ta andando bao di e hobennan y bao di comunidad di Aruba.

Nan tin algo hasta mas nobo, mas leu tocante di e conexion cu comunidad. Esaki ta TPH College Tour. Esaki ta un cooperacion entre TPH y Tele Aruba. A cuminsa pensa con por laga e muchanan sa, aunke no ta bay e scol cu abo tabata kier, toch bo por logra algo despues.

Por ta bo tabata kier a bay un scol mas halto, un nivel mas halto. Bo kier a bay un scol mas cerca, unda tur bo amigonan a bay. Toch bo por logra algo despues. A busca diferente rolemodel aki na Aruba. A scoge tres diferente rolemodel pa e prome grabacion. A scoge Ivo Yanez, sr. Jacintho Rasmijn di Cuts & Curves, Juan Carlos Espinal, y pa laga wak kico nan tarea tabata, con nan a logra bay te unda nan ta. Na e momentonan aki nos conoce Ivo Yanez, sr. Rasmijn y Espinal como positive rolemodels. Ta wak con nan toch a logra toch despues di un tarea basta dificil.

Di esey a traha un programa di television. Ta un serie di tres programa cu Tele Aruba ta transmiti entrante otro siman, esta 8, 10 y 12 di juli, pa laga wak kico bo por logra aunke solamente b’a bay EPB, mescos cu Espinal of solamente a bay John Wesley College, mescos cu Ivo Yanez, toch bo por logra cosnan hopi grandi.

Esey ta loke TPH kier pa comunidad sa, cu aunke scol ta hopi importante, e diplomanan cu bo tin ta habri porta pabo den futuro, pero por ta e papel cu bo tin no ta riba e nivel cu abo lo kier of bo mayornan lo kier. Bo por uza bo talentonan pa bay mas leu. Bo desaroyo di talento tambe ta hopi importante. Ta p’esey un programa, manera TPH College Tour, ta asina importante pa tur adulto, pa hunto cu nan yiunan wak, p’asina nan sa algo di e rolemodelnan. Tur hende kier sa kico e mensahe di Ivo Yanez su tata tabata, cu e kier a bay mas leu. Kico e mensahe cu Rasmijn a haya ora cu e kier a habri su prome Cuts & Curves, pasobra e ta doño y brainchild di Cuts & Curves. Kico Espinal a logra despues cu su mama a bin for di Republica Dominicana na Aruba, como un persona cu no tabata tin tur e fondonan y toch a lucha y bay p’adilanti.

E raiznan ey, con el a cana bay dilanti y toch no a give up. Esey ta loke kier pa e hobennan, adolescente y adultonan tende, p’asina nan sa, cu aunke bo no tin e papel, cu pensamento positivo, lo lagabo logra hasta mas cu e papel di MAVO of HAVO cu b’a logra. Esey ta loke cu TPH kier laga bin dilanti. Scol ta hopi importante. Kier pa tur mucha sigui bay mas halto cu nan por, pero bo desaroyo di talento tambe mester tin un parti grandi den nos comunidad. E programa TPH College Tour lo laga esey bin dilanti door di e positive rolemodelnan di Aruba.