Rafael Estrada, un di e personanan bezig cu Fast Ferry, a splica cu e ta kere cifra di e cantidad di pasaheronan lo ta mas halto cu loke nan mes ta premira.
E trafico di pasahero a wordo calcula. A papia cu diferente experto na tanto Boneiro, Corsou y Aruba pa check con e mercadonan ta. A mira e cifranan di aviacion entre Boneiro, Corsou y Aruba. A mira e tarifanan di avion cu ta existente awor aki y ta ridiculo. Ultimo biaha cu Estrada mester a biaha pa Boneiro, e mester a paga casi 600 florin. Ultimo biaha cu tabata tin e reunionnan di IPKO, tabata tn parlamentarionan cu a bin di Hulanda, a biaha pa Boneiro, sigui pa Corsou y despues yega nan destino final cual ta Aruba, pa IPKO. Nan a keda increiblemente sorprendi cu e haltura di e ticketnan. Nan a puntra nan mes ta con por ta posibel cu famianan cu ta biba na Boneiro, Corsou y Aruba, con nan por bishita otro, pasobra e tarifanan ta esunnan mas halto na mundo, pa un trayecto asina cortico.
A uza e tarifanan halto ey y a check si halveer e tarifanan halto ey pa haci nan mas accesibel pa pueblonan di Aruba, Boneiro y Corsou, con hopi hende por haya pa bishita otro.
Ademas di esey, segun Estrada, por ehempel tempo cu e tabata na Hulanda encarga cu ATA Europa, e tabat tin contacto cu e tour operatornan y nan semper tabata puntra ta dicon no tin e tarifanan cu nan tabata tin antes, tabata un tarifa comun. Si kier a bishita un isla extra, ta paga algo extra. Despues a stop cu esey, y a bira practicamente prohibi pa bishita e tres islanan, mientras cu e deseo di e Europeonan tabata, cu ora nan bishita un di e tres islanan pa di prome biaha, nan kier bishita tur tres. Esey ta bira posibel cu un Fast Ferry, caminda cu un tarifa minimo, por bishita tur tres isla.
Ta pensa riba tarifanan cu ta mita di e tarifanan di aviacion.
Distancia
Pa loke ta e distancia, Estrada a splica cu ta depende. Saliendo for di San Nicolas, bay Westpunt, pero no tin un puerto eynan. E por tarda 1 ora y 15 minuut. Si mester bay Corsou, caminda cu Curacao Ports Authority a bisa cu nan tin un Ferry Terminal, esey lo haci cu tin cu agrega mas of menos un ora y 15 minuut mas. E ora e ta bira 2 ora y mey pa por yega Corsou. Esey a haci cu e plannan original cu tabata tin pa sali mainta tempran for di Aruba y haci dos biahe, Aruba-Corsou, Corsou-Boneiro y despues Boneiro-Corsou, Corsou-Aruba.
Haci’e dos biaha caminda cu tin e conexion saliendo mainta tempran for di Aruba, bay Corsou, bay Boneiro y bin bek anochi. Sinembargo door cu mester a haci uzo di recomendacionnan di Curacao Ports Authority, a haci cu no lo tabata posibel pa haci’e e dagrond verbinding cu Boneiro mas. Esey tabata hopi lamentabel. Pero saliendo for di San Nicolas, ta scapa mucho mas tempo y esey ta haci tambe cu e operacion ta bira mas viabel. San Nicolas-Oranjestad ta mas of menos 20 pa 30 minuut di nabegacion. Esey ta awor aki ta haci’e mucho mas interesante pa e Ferry operator.
Estrada a sigui menciona cu anteriormente tabata tin competencianan di deporte escolar. Tur e cosnan ey practicamente a keda paralisa door cu no tin conexion entre e tres islanan. Esey lo bay bira posibel atrobe.
Awor aki no tin practicamente negoshi entre Aruba, Boneiro y Corsou, pasobra e handelsbevordering ta minimo pa motibo cu ta asina costoso transporta productonan di Aruba pa Boneiro y Corsou. En cambio cu un Fast Ferry diario, ta bay haci cu lo bay tin masha hopi negoshi, Estrada a enfoca.
