Studiantenan a yega bon Hulanda

Cu vuelo 765 di KLM a yega awe 5 di augustus un cantidad di 173 studiante Arubano pa sigui un estudio avansa na nivel HBO of Universidad na Hulanda. Na Schiphol un delegacion consistiendo di Minister Plenipotenciario Guillfred Besaril, director a.i. di Gabinete di Aruba mr. Glenn Ling, funcionarionan di Departamento di Enseñansa di Gabinete di Aruba, studiementor y miembronan di e POC (Plaatselijke Opvangcommissie) a ricibi e studiantenan.

Minister Plenipotenciario Guillfred Besaril, director a.i. mr. Glenn Ling y coordinador di Departamento di Enseñansa di Gabinete di Aruba, James van der Linde, tabata pafo di e sala di yegada pa ricibi e studiantenan y yama nan bon bini na Hulanda.

Dialuna 6 di augustus e studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cay bou di Gabinete di Aruba.

Riba e website di Cas di Aruba www.arubahuis.nl tin un reportahe fotografico extenso di e yegada di e studiantenan.