Presidente di SADA, alabes vocero di demas sindicatonan cu ta luchando pa indexering, Edward Maduro, a splica cu e sindicatonan cu ta participando den e reunionnan di Sindicatonan cu tin representacion den e aparato gubernamental ta SEPPA, SIMAR, TOPA, SPA y SADA. Nan a bin ta participando den reunionnan cu ta tumando luga den e ultimo lunanan cu Gobierno di Aruba.
E sindicatonan a acerca Gobierno den persona di Prome Minister di Aruba y Minister di Finansas, como dunador di trabao pa loke ta indexering. A sinta varios biaha na mesa riba e tema aki. Tabata tin intercambio di carta entre Gobierno y sindicatonan unda cu a mustra Gobierno kico ta e punto di salida di e sindicatonan, a splica nan cu mirando cu tabata tin un inflacion aña pasa, segun cifranan di CBS, a pone cu a acerca Gobierno como dunador di trabao pa wak con por negosha indexering, p’asina recobra bek loke a perde den e forsa di compra debi na e inflacion.
Gobierno su reaccion te awor tabata cu no tin mucho espacio debi na situacion financiero ta precario. Nan a informa Gobierno cu nan ta compronde e parti aki, pero como bon dunado di trabao, nan mester ta un trendsetter tambe. “Aki ta caminda cu ta bezig ta puntrando y pidiendo Gobierno pa duna un proposicion. Punto di salida ta e cifranan di CBS, cual ta 3.6%. Aki ta wardando riba Gobierno pa duna un contraproposicion pa asina cuminsa negosha e indexering.”
E carta pidiendo un proposicion a wordo entrega dos siman pasa caba. Conseho di Minister a yama e sindicatonan siman pasa caminda y nan a pidi pa tempo. Aworaki e sindicatonan ta den nan seno ta reuniendo pa asina dicidi y tambe pa contesta gobierno riba e carta cu nan a haya y mira kico ta e proximo pasonan cu ta bay tuma.
Tempo
Tempo ta algo cu e sindicatonan a pidi Gobierno pa ta mas specifico den dje. Ora nan ta asina leu lo yama un rueda di prensa, p’asina duna un solo splicacion, bay den detaye. Ta scucha hopi informacion eroneo ta core rond. Hopi comentario cu no ta cuadra cu e realidad. Logicamente e ora e sindicatonan mester duna un splicacion y p’asina por pone tur hende riba e mesun liña pa nan por compronde kico ta punto di salida di e sindicatonan y di unda a sali. El a bisa cu pronto lo yama un rueda di prensa pa duna mas detayes.
Ultimo aña cu tabata tin indexering tabata na 2013. Despues di esey tabata tin un protocol firma. “Ora cu papia di indexering ta pasobra tabata tin inflacion den e aña anterior. Si no tin inflacion den e aña anterior, no por pidi indexering. Si por ehempel aña pasa no tabata tin inflacion, awor aki no ta sinta na mesa cu Gobierno ta papia riba indexering. Si e aña aki kisas no tin inflacion, otro aña no por papia cu Gobierno riba indexering. Tanten cu no tin inflacion, segun cifranan di CBS, no por bati na porta di bo dunado di trabao pa pidi un recompensacion pa loke ta perdida di forsa di compra.”
E situacion
E situacion di e miembronan no ta facil, segun Maduro. E pregunta constantemente ta bin kico Gobierno ta bay duna, of kico e doño di trabao ta bay duna. Ta bisa Gobierno, pero en realidad e ta doño di trabao tambe. E ta responsabel pa su trahadonan. Ora cu miembronan ta bati na porta y ta bisa cu cosnan ta birando impagabel pa nan. Miembronan ta preocupa. Reaccionnan cu ta hayando ta mustra esey y tur sindicatonan ta sinti esey di nan miembronan.
