Diahuebs mainta a sosode un caso serio den prison. Tres preso ta deteni y ta pasando e proceso di interogacion na warda pa e hincamento serio. E tabata un bringamento caminda tres preso ta wordo sospecha di a bringa y hinca e preso Jason Mathilda. Jason Mathilda tabata sera den pasado den un caso di asesinato. Awendia e ta sera pa e atraco dilanti RBC Sasaki algun luna pasa y algun siman pasa a detene den marduga na Pos Abou.
Pa un of otro motibo a surgi un problema serio cu a conduci na agresion cu hincamento. E golpinan y hinca segun informacion ta na e parti di cabes. Ta bisa cu te hasta tin un hinca serio den orea. Ora e pelea pisa a cuminsa a pidi refuerso di tur esnan trahando pa bin yuda kibra e pelea. Asina a evita cu nan a mata Jason Mathilda den KIA mes. A hibe cu urgencia pa Hospital unda ta teme pa su bida. Recherche awor tin atencion pa e caso. Tambe nos tin informacion cu KIA ta pata pata di hende. Trein no ta coriendo den prison.
Trein ta e idioma di preso. Trein kiermen cu prome cu tempo ta laga presonan haya nan libertad segun tambe nan comportacion y delito cu nan ta sintando castigo pe. Minister no kier laga trein core y laga hende bay liber prome cu tempo. Despues cu minister a faya y firma ciegamente y laga pedofielnan den libertad, pueblo a rabia masha y di e dia ey cosnan a para. KIA ta full full y dor cu tin asina hopi preso eyden ta bira situacion di tension. Presonan cu tin problema cu otro ta topa otro y cu tur consecuencia. Pa colmo pa mesun motibo cu KIA ta yen tin tambe hendenan sera mas cu diez dia den wardanan di Polis.
E proceso di detencion ora di investigacion ta di diez dia na warda. Tin hende actualmente sera 20 dia caba na warda di Polis sin por yega den KIA pa falta di espacio. E problema aki ta termina tambe den un problema serio pa e cuidadornan mes cu no ta sinti nan mes safe cu e situacion actual cu un KIA demasiado yen. Ta bon pa e minister mes sali splica ki tur ta pasando prome cu baca hoga.
