Den un carta cu Minister Chris Romero a firma riba diasabra 7 di april ultimo, e ta informa autoridadnan di waf cu no ta permiti pa botonan “peñero” drenta nos waf mas cu carga. E decision aki, cu tur probabilidad, lo tin di haber cu e medidanan cu ta tumando luga la evita contrabanda for di Venezuela pa Aruba.
E tipo di “lancha” nan asina ta conoci pa yega waf y para banda di otro na e pier, tin biaha te cu 7 mara na banda di otro. Nan ta esunnan cu ta trece pisca, hero bieu, koper y tin biaha hasta gasolin. Segun investigacion, ta uza e tipo di botonan asina primordialmente pa contrabanda.
E bentaha di e botonan aki ta cu nan ta move lihe riba lama y ta diseña y traha pa e laman bruto entre Venezuela y Aruba. Consecuentemente e forma di e boto, cu un punta dilanti, ta corta e olanan cu hopi facilidad y como tal ta logra alcansa un velocidad halto durante nabegacion.
Pero, e boto no ta destina pa carga. Mayoria di nan ta habri y no tin ni dak. Esaki ta haci cu ta transporta carga na un forma masha peligroso y e piscanan hopi bes den situacion no higienico.
E forma di mara banda di otro na waf ta masha peligroso y ta forma un peliger pa e tripulantenan, pero tambe pa e Douanero cu mester pasa bula di un boto pa otro pa por controla e carga cu cada un a trece. Ta di masha tempo tabatin critica riba e forma di proceder aki pero pa un motibo of otro no a logra yega na un decision final.
Mirando cu Reino Hulandes (Aruba) y Venezuela a firma un acuerdo di cooperacion cu otro, a stipula cu lo bira hopi mas streng na nos fronteranan. Esaki pa evita contrabanda di productonan di un banda y di otro banda pa evita ilegalidad bou di “turistanan” cu no ta regresa nan pais bek den e tempo stipula. Conocedonan di e materia ta opina cu e decision aki di Minister Romero sin duda lo yuda den combatimento di contrabanda pasobra e tipo di botonan aki ta conoci pa e meta specifico ey!
