Carlos Hodge posibel candidato pa Presidente di SPA

Awe Dialuna dia 9 di april ta tuma luga e reunion general di Sindicato di Polis Aruba, SPA na nan sede na Club POVA na Santa Cruz pa 10:00am. Durante e reunion di awe, e miembronan, mayoria Polis, tin cu dicidi entre sigui cu e directiva actual of sino scoge pa un directiva nobo. Aunke cu ta specula cu Omar de Kort lo por ta esun pa dirigi e directiva nobo, nos a haya confirmacion cu lo scoge un Polis pensiona pa ta na cabes.

For di fuentenan bon na altura nos a compronde cu e nomber cu mas ta resonando ta di ex Inspector Carlos Hodge, cu recientemente a baha cu pensioen. Ta trata aki di un Polis cu hopi aña di experencia, cu ta conta cu un trayectoria largo den e organisacion policial y cu ta gosa di masha respet den e Polisnan cu mas aña den e cuerpo pero tambe di e hobennan.

Parce cu e grupo nobo cu ta aspirando pa tuma directiva di SPA over tin como vision pa miho e Presidente no ta un Polis activo. Ta teme cu e no lo tin suficiente tempo pa atende miembronan y cu lo por persigui’e of intimid’e den su trabou diario. Ta cu esey den mente a pensa riba un persona cu no ta den servicio activo, cu de facto….lo no tin “nada di perde” den su trabou mas pasobra e ta cu pensioen.

E formula aki no ta desconoci den sindicalismo na Aruba pasobra te cu recien, Sindicato UEA di Elmar tabatin Coby Geerman como Presidente, siendo un pensionado di WEB. A haci uzo di su experencia, su conocemento riba materia di utilidad y su netwerk den comunidad pa representa trahadonan di Elmar.

E situacion actual

Sindicato di Polis (SPA) ta conta cu Edgar Maduro na cabes awor como Presidente. E ta yegando apenas 1 aña na poder, despues di a tuma over di Juancho Gomez. Sinembargo, miembronan tin problema di su decisionnan cu e ta tuma, sin consulta cu su base, pues cu su miembronan.

E grupo nobo

Omar de Kort no ta un desconoci den SPA. El a fungi como Secretario di SPA den e directiva di Miguel Maduro y despues parcialmente cu Guilfred Besaril. De Kort a bira Polis na aña 2001 y a sali traha como Polis uniforma na San Nicolas. Actualmente e tin 14 aña caba trahando na Bureau Forensisch Technische Onderzoeken (BFTO) y tin 4 strepi den funcion di Generalist.Su vision no ta pa bira Presidente di SPA, pero si pa logra cambionan structural den e organisacion di e sindicato. E ta desea pa aumenta e directiva na 13 miembro, pa tin un of mas representante di tur departamento di Polis.

E puntonan riba agenda ta:

1. Adaptacion di e Statutonan di SPA

2. Protocol entre SPA y Minister Andin Bikker (POR)

3. Fecha pa presentacion di APFA relaciona cu areglo di pensioen

4. Crea un comision di caha pa revisa e cifranan anual di SPA

5. Mocion emiti dor di Omar de Kort durante reunion di 20 di februari 2018.Durante e reunion aki, e actual Presidente di SPA, Edgar Maduro lo midi su popularidad ainda den e miembronan di e sindicato, pa sa si e ta keda na cabes of mayoria lo aproba e mocion cu ta exigi su retiro y di su directiva. E ambiente den Polis ta dividi entre e mas hobennan y esunnan cu mas aña den e Cuerpo.