Kedando den e esfera di concientisacion di e luna di Cancer, Departamento di Salud Publico ta bin e siman aki cu un otro topico, cual lo enfoca riba cancer na boca di matris.
Cancer na boca di matris ta un di e tres cancernan cu mas ta afecta e hende muhe y ta hopi importante pa papia y informa e hende muhenan riba e topico aki, esaki segun Jurette Croes di e departamento di comunicacion y informacion di Departamento di Salud Publico.
Pa aña un promedio di 10 caso nobo ta keda diagnostica na Aruba, di cual 3 persona pa aña ta fayece pa motibo di cancer na boca di matris.
E edad mas afecta ta e edad di 35 pa 45 aña, cual ta personanan relativamente hoben y pesey ta hopi importante pa por enfoca riba e problematica aki. Cancer na boca di matris ta un di e cancernan cu hopi facil por wordo preveni y tambe hopi facil pa wordo diagnostica na un tempo hopi temperan. Preveni por haci esaki door di vacuna na nos muchanan hoben prome cu nan ta sexualmente activo y e hende grandi, mayor, por haci esaki door di haci paptest regularmente.
