No ta mucho tempo pasa cu Gobierno haci e introduccion di un sistema digital pa pasa rijbewijs. Despues di un tempo relativamente cortico a bin descubri cu no ta tur hende por cu e sistema digital.
A bin constata cu na momento cu un grupo grandi di hende bin pasa e test aki pareu, cu tin personanan cu no tin e habilidad, sea debi na nan edad of tin un ke otro impedimento pa por pasa e rijbewijs digital, pa cual a introduci dia 30 di december ultimo e posibilidad cu nan por pasa esaki na e manera tradicional.
Esaki, segun Minister di Husticia, Andin Bikker, ta un mehoracion. Ademas di esey, nan ta bezig riba e tereno aki pa bin cu mas adelanto pa asina pone e problema di retraso di rijbewijs ta algo cu ta pasa pa historia.
Ademas di esey, a dicidi den Ministerraad cu e dunamento di rijbewijs, no e examen, ni e teoria, tampoco practica, ta keda na KPA.
Censo
Pero pa loke ta trata e uitgifte, e sitio unda ta busca e rijbewijs, a termino corto lo bay pasa over pa Censo. Na Hulanda esaki ta e caso caba. Lo bay over e ora pa e documento eynan, caminda cu Censo lo otorga esaki.
A dicidi esaki pasobra a constata cu tabata tin fout y no ta di awo. Durante eleccion 2017 caba tabata tin un diferencia di opinion riba esaki, pasobra den e handmatig invulling pa loke ta nombernan, tin biaha tabata tin discrepancia. Mirando cu Censo mes lo bay haci’e, no lo tin e discrepancia aki mas.
Registro di rijbewijs internacional
Los di esaki, Minister Bikker a menciona cu na momento cu nan a drenta gobernacion, nan a confronta cu diferente reto.
A bin resulta cu e gabinete anterior, no a registra e rijbewijs internacionalmente. Tabata tin hende cu tabata bay cu vakantie cu a haya boet y no por a huur auto pasobra e rijbewijs no tabata registra.
Na Juli di 2018 a confronta cu e retonan aki pasobra hopi hende a bay cu vakantie y a pasa den e dilema aki.
Na Belgica tabata tin algun hende a haya boet. A haya e melding aki e tempo ey for di e Minister Plenipotenciario na Hulanda, caminda diferente hende a mustra cu nan a haya boet pasobra e rijbewijs no tabata registra.
Berdad e rijbewijs no tabata registra den registronan internacional y a bay over inmediatamente pa por haci esaki.
Propiedad intelectual
Un di e retonan cu e Ministerio di Husticia a enfrenta ta di un dimension tragicomico algun siman pasa, segun Minister Andin Bikker.
Aparentemente e compania cu a suministra e diseño di e rijbewijs di Aruba, a registra esaki na propiedad intelectual como diseño propio, y a bin descubri esaki ora cu a cuminsa cu e proceso pa pasa e “uitgifte” di rijbewijs pa Censo.
Huridicamente Gobierno a refuta esaki. A bin sali na cla cu Aruba a paga un suma cuantioso na 2015 di 53 mil florin como opdracht pa diseña e rijbewijs.
No obstante esey, e tempo ey Gobierno anterior a tolera, of no tabata sa. Huridicamente a contesta e compania aki y bis’e cu a paga un suma cuantioso pa por a produci e diseño pa traha rijbewijs door di pais Aruba, cu ta opdrachtgever.
Den e cuadro aki, segun hurisprudencia y den cuadro di ley di auteursrecht, pais Aruba tin e derecho riba e rijbewijs, pa nan sigui haci uzo di e diseño aki.
Mientras tanto ta laga diseña un rijbewijs nobo, pasobra ta busca solucion y no ta bay den polemica, e Minister a comenta.